Չնայած պաշտոնական քարոզարշավը դեռ չի սկսվել՝ Տավուշի մարզում ընտրապայքարը բավականին թեժացել է: Արդեն ուրվագծվում են այն հիմնական թեկնածուները, ովքեր պայքարելու են Տավուշի մարզի ռեյտինգային մանդատներին տիրանալու համար:
՛՛Գրանդ՛՛ հոլդինգի ղեկավար Միքայել Վարդանյանը ՀՀԿ ռեյտինգային ցուցակներում ընդգրկված իր հովանավորյալի հետ արդեն շրջում է մարզի համայնքներում և գումարներ է բաժանում:
Բավականին ակտիվ է նաև ՛՛Ծառուկյան՛՛ դաշինքից ռեյտինգայինով առաջադրված Վարուժան Բաբաջանյանը: Այս օրերին Բաբաջանյանը ակտիվ հանդիպումների մեջ է մարզի հասարակական - քաղաքական շրջանակների, նախկին ու ներկա պաշտոնյաների հետ: Մեր տեղեկություններով՝ Վարուժան Բաբաջանյանի նախընտրական շտաբը արդեն բավականին ներկայանալի տեսք ունի. նրան հաջողվել է իր շուրջը միավորել մարզի հասարակական - քաղաքական ակտիվի, նախկին ու ներկա պաշտոնյաների մի զգալի մասին և այս պահին թերևս միակ թեկնածուն է, որ նախընտրական կառույցներ է ձևավորել գրեթե մարզի ամբողջ տարածքում:
Առայժմ պասիվ քարոզարշավ է վարում ճանաչված վիրաբույժ, ՀՅԴ ռեյտինգային ցուցակում ընդգրկված Արտավազդ Սահակյանը: Չնայած այս հանգամանքին՝ Սահակյանը ևս դասվում է զգալի ձայներ հավաքելու հավակնորդների թվին:
Չնայած բավականաչափ թուլացած դիրքերին՝ ռեյտինգային ընտրակարգով մանդատ ստանալու հույսը չի կորցրել նաև ՀՀԿ ցուցակում ընդգրկված Հակոբ Հակոբյանը՝ ՛՛Կիլիկիա՛՛ գարեջրի գործարանի սեփականատերը: Նա ևս այս պահին ակտիվորեն փորձում է թիմ հավաքագրել:
Չնայած դեռևս ընտրական պրոցեսը քարոզչության փուլ չի թևակոխել՝ արդեն ակնհայտ է, որ մանդատ ստանալու հիմնական պայքարը ընթանում է հենց այս չորս թեկնածուների միջև:
