ՌԴ-ն դիվանագիտական լեքսիկոնով կրկին հերքում է Փաշինյանին
ՎԵՐԼՈՒԾՈՒԹՅՈՒՆՆԵՐ
«Եթե նման հայտարարություններով փորձ է արվում արդարացնել Եվրոպական Միությանը տարածաշրջան ներքաշելը, ապա դժվար թե այդ փորձը կարելի է հաջողված համարել»,- այս մասին ամենշաբաթյա ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով ՀՀ վարչապետ Նիկոլ Փաշինյանի այն հայտարարությունը, որ ԵՄ դիտորդական առաքելության նպատակներից մեկը Արևմուտքի կասկածները փարատելն է, այսինքն Բաքվի հավաստիացումներն արևմտյան գործընկերներին այն մասին, որ Հայաստանն ու Ռուսաստանի Դաշնությունը միասին ագրեսիա են ծրագրում Ադրբեջանի դեմ։
Զախարովայի խոսքով՝ ռուս խաղաղապահներն ապահովում են խաղաղությունը Լեռնային Ղարաբաղում և դրա վերաբերյալ Ադրբեջանից իրենք երբեք դժգոհություն չեն լսել, բայց հայտարարում է. «…միևնույն ժամանակ գիտենք ԵՄ-ի՝ Հայաստանում դիտորդական առաքելությունը տեղակայելու որոշման վերաբերյալ Ադրբեջանի քննադատական վերաբերմունքի մասին»,- նշել է Զախարովան։
Այսինքն՝ Զախարովայի շուրթերով Ռուսաստանը կրկին հերքում է Փաշինյանին: Ստացվում է, որ Զախարովան դիվանագիտական լեքսիկոնով հայտարարում է, որ Փաշինյանը ստում է, և տարածաշրջանում միայն ՀՀ-ն է ցանկանում ԵՄ առաքելության տեղակայում:
ՌԴ-ն փաստացի ՀՀ վարչապետին մեղադրում է, որ ԵՄ-ին տարածաշրջան բերելու համար փորձում է խնդիրներ ստեղծել նաև Ռուսաստան-Ադրբեջան հարաբերություններում: ՌԴ-ին ԵՄ-ն պետք չէ, իսկ Ալիևը երբեք հրապարակային չի խոսել ՌԴ կամ ՀԱՊԿ համատեղ ինչ-որ գործողության մասին:
Ճիշտ հակառակը՝ Ալիևն ասում էր, որ ՀԱՊԿ-ում Ադրբեջանն ավելի շատ բարեկամներ ունի, քան Հայաստանը: Իսկ ԵՄ-ի կամ այլ որևէ կառույցի ներգրավվածությունը հայ-ադրբեջանական հարաբերություններում իրեն առնվազն խանգարելու է: Բացի այդ, ՌԴ-ին տարածաշրջանից դուրս թողնել այս պահին չի բխում նաև Ադրբեջանի շահերից: ՌԴ-ն անբացատրելի կերպով խանգարում է անձամբ Նիկոլ Փաշինյանին: Կառավարության նիստում, Լաչինի միջանցքի արգելափակման հարցին անդրադառնալիս Փաշինյանն ասաց, որ ինքը սպառնալիք է համարում ՌԴ-ի զինված ներկայությունը ՀՀ սահմանին, եթե նրանք չեն կարողանում կատարել իրենց գործառույթները և չեն ապահովում Լաչինի միջանցքով քաղաքացիների ազատ տեղաշարժը:
Զախարովան խոսել է նաև Բրյուսելի հեռահար նպատակներից. «Ակնհայտ է, որ Բրյուսելը նպատակ ունի փոխել անվտանգության համակարգը, որը ձևավորվել է տարածաշրջանում….Ուզում ենք հավատալ, որ Երևանը դա հասկանում և հաշվի է առնում…»,- ասել է Զախարովան։
Իսկ եթե մի օր Ռուսատանը նման հայտարարությունների ֆոնին կորցնի իր հույսն, ապա ի՞նչ է լինելու: Հրաշալի վարվող արտաքին քաղաքականության մասին լեգենդներ պատմող քաղաքական ուժն այս մասին մտածե՞լ է:
Աննա Ավետիսյան
