Երկու հարցազրույց, բազում եզրակացություններ. Ռուսաստանի և Իրանի դիրքորոշումները տարբերվում են

Երեկ, երկու հարցազրույց բավականին ուշագրավ պատկերացումներ են տալիս տարածաշրջանում ստեղծված իրողությունների վերաբերյալ։ Ադրբեջանում Ռուսաստանի դեսպան Միխայիլ Բոչարնիկովը «Haqqin.az» կայքին տված հարցազրույցում կարծիք է հայտնել, որ այսպես կոչված Զանգեզուրի միջանցքի ծրագիրը, որով Բաքուն ցանկանում է Հայաստանի տարածքով անխափան կապ ունենալ Նախիջևանի հետ, ունի իրագործման բոլոր հիմքերը։

«Ես կարծում եմ, որ այդ ուղղությունը կյանքի կոչվելու բոլոր հիմքերն ունի և այս հարցում անհաղթահարելի տարաձայնություններ չեմ տեսնում, հուսով եմ, որ տնտեսական նկատառումներն ի վերջո կգերակայեն նաև այստեղ»,- ասել է Բոչարնիկովը։ Միևնույն ժամանակ, երեկ ճեպազրույց է տվել Հայաստանում Իրանի դեսպան Աբաս Բադախշան Զոհուրին՝ նշելով, թե Հայաստանն ու Իրանը պետք է ունենան հստակ օրակարգ և չպետք է թույլ տան, որ որևէ միջանցք ստեղծվի։

«Հայաստանն ու Իրանը հարևաններ են, կան ու կլինեն հարևաններ, իհարկե,  որոշակի խորամանկություններ նկատվում են, և խոսում են, այսպես կոչված, միջանցքների, ինչ-որ գործողությունների մասին, սակայն Իրանը և Հայաստանը թույլ չեն տա, որ նման միջանցք ստեղծվի»,- ասել է Հայաստանում Իրանի դեսպանը՝ ընդգծելով, որ թե՛ իրանական, թե՛ հայկական կողմի դիրքորոշումը շատ հստակ է։

Ադրբեջանցի լրագրողը Բոչարնիկովից հետաքրքրվել է նաև Հայաստանում Եվրամիության դիտորդական խմբի տեղակայման վերաբերյալ, ինչին Ռուսաստանի ներկայացուցիչը բավականին ագրեսիվ և նյարդային է արձագանքել, հատկապես շեշտել է, որ այդ դիտորդների կազմում ֆրանսիացի անդամներ են լինելու, ինչը լրջորեն մտահոգում և անհանգստացնում է Ռուսաստանին։

Լրագրողները Եվրամիության դիտորդների վերաբերյալ հարց են տվել նաև Հայաստանում Իրանի դեսպանին՝ նշելով, որ տարածաշրջանային խնդիրները պետք է լուծեն տարածաշրջանի երկրները, Իրանի դեսպանը բավական դիվանագիտական պատասխան է տվել, ընդգծել, թե Իրանը դեմ չէ Հայաստանում Եվրամիության դիտորդների տեղակայմանը։

Ըստ էության, երկու առանցքային հարցերի վերաբերյալ՝ Ռուսաստանի և Իրանի մոտեցումների լիակատար տարբերությունը վկայում է, որ Հայաստանը խուսանավելու բավականին հետաքրքիր, ուշագրավ տեղեր ունի։

 Եթե Ռուսատանը շարունակում է պնդել Զանգեզուրի միջանցքի վրա, ապա միանշանակ է, որ առնվազն այս հարցում Արևմուտքն ու Իրանը գրեթե ունեն կոնսեսուս խանգարելու թուրք-ադրբեջանական տանդեմին, ինչպես նաև թույլ չտալու, որ Հայաստանի վրա ճնշումներ գործադրվեն։ Իհարկե, Հայաստանի դիրքերը 44-օրյա պատերազմից հետո չափազանց հեղհեղուկ են, սակայն ստեղծվել է մի իրավիճակ, երբ մեր պետությունը գոնե կկարողանա, առնվազն, խուսանավել, մանևրել և ամեն գնով թույլ չտալ Զանգեզուրի միջանցքի տրամադրում։

Անի Կարապետյան