Մալաթիայի շուկայի փակման շուրջ արձագանքը վկայում է քաղաքակա մտքի բացակայության մասին

Մալաթիայի տոնավաճառի փակման շուրջ հանրության և քաղաքական ուժերի արձագանքը հերթական անգամ վկայում է Հայաստանում քաղաքական մտքի ճգնաժամի, ինչպես նաև փաշինյանական իշխանության՝ սեփական ժողովրդի հույզերի վրա խաղալու վարպետության մասին։ Հիշեցնենք՝ տեսչական մարմինը երեկվանից դադարեցրել է Մալաթիա տոնավաճառի աշխատանքը։

600-ից ավելի տնտեսվարողներ բողոքի ակցիա են արել, դիմել Նիկոլ Փաշինյանին՝ խնդրելով թույլատրել իրենց աշխատանքը։ Այն, որ փաշինյանական վարչախումբն ամենևին էլ հետևողական չէ սեփական որոշումները մինչև վերջ իրակաանցնելու հարցում՝ վաղուց պարզ էր։

Պոպուլիստ իշխանությունն ամեն ինչ անում է այսրոպեական խնդիրներին լուծում տալու, այդ կերպ հանրության մի հատվածի մոտ սեփական PR-ն իրականացնելու համար, ինչն էլ եղավ նույն Մալաթիայի տոնավաճառի դեպքում։ Բողոքի ակցիայի մասնակիցներից մեկ տասնյակ մարդկանց հետ հանդիպած ՔՀՏ տեսչական մարմնի ղեկավարը խոստացել է, որ ժամկետ կտրամադրեն թերությունները վերականգնելու համար, որից հետո տոնավաճառը չի փակվի , այլ կկարողանա աշխատել։ Չի բացառվում, որ ի վերջո տեսչական մարմինը մեկ-երկու թերություն վերացնելուց հետո թույլատրի տոնավաճառի աշխատանքը մինչև, Աստված մի արասցե, որևէ ողբերգական դեպք լինի։

Հարկ է նշել, որ ընդդիմադիր քաղաքական ուժերը այդպես էլ չկանգնեցին Մալաթիայի տոնավաճառի աշխատակիցների կողքին, մի մասն էլպարզապես չարախնդում էր, առևտրականներին մեղադրում Նիկոլ Փաշինյանի գովքը անելու, նրան ընտրելու և այսօր դրա համար պատասխան տալու մեջ։

Ընդդիմությունը փոխանակ ինքը գնար և կանգներ այդ տոնավաճառի աշխատակիցների կողքին, բացարձակապես մատը մատին չխփեց, փոխարենը Նիոլ Փաշինյանը իր լրատվամիջոցների և սպասարկուների միջոցով հերթական անգամ հանրությանը կներկայացնի, թե իբր իրեն ճիշտ չեն զեկուցել,տեղյակ չի եղել խնդիրներից և միայն իր գործուն ջանքերի շնորհիվ 600 հոգի չի կորցրել աշխատանքը։

Ստացվում է, որ վարչախումբը չեղած տեղից սեփական փիարն անելու հնարավորություն է ստեղծում, իսկ ընդդդիմությունը բացառապես աջակցում է նրան այդ հարցում։

Լիաննա Մանուկյան