Ադրբեջանի դեսպանի հետ հանդիպմանը Ռոտերդամի քաղաքապետը սուր քննադատության է ենթարկել Հայաստանի նկատմամբ ոտնձգությունը և կոչ արել ապաշրջափակել Լաչինի միջանցքը
ՎԵՐԼՈՒԾՈՒԹՅՈՒՆՆԵՐ
Infoteka24.ru-ն գրում է, որ Նիդեռլանդների Քրիստոնեական միություն կուսակցությունը քննադատել է Ռոտերդամի քաղաքապետ Ահմեդ Աբութալեբին անցյալ տարվա դեկտեմբերին Նիդեռլանդներում Ադրբեջանի դեսպանի հետ հանդիպման համար և գրավոր հարցեր է տվել այդ մասին։
Քաղաքային խորհրդի պատգամավոր Տ.Ֆոնկը գրավոր հարցեր է ուղարկել քաղաքապետարանի գործադիր խորհրդին այդ հանդիպման վերաբերյալ նշելով, որ Քրիստոնեական միություն կուսակցության տեսակետից այդ հանդիպումը խիստ անցանկալի է և պնդել է, որ «Ադրբեջանը Հայաստանի որոշ հատվածներ օկուպացված երկիր է, նա աղավաղում է հայ ժողովրդի դիմագիծը և ոչնչացնում հայկական մշակութային արժեքները, Genocide Watch-ը նույնիսկ ցեղասպանության նախազգուշացում է արել, որը, ի թիվս այլ բաների, իրականացվում է Ադրբեջանի կողմից Լաչինի միջանցքի ներկայիս շրջափակմամբ, ուստի անընդունելի է լեգիտիմացնել նման պահվածքը հանդիպելով Ադրբեջանի դեսպանի հետ»։
Հարցերին ի պատասխան քաղաքապետը նշել է, որ տեղյակ է Հայաստանի և Ադրբեջանի միջև առկա հակամարտությանը և պաշտպանում է Նիդեռլանդների կառավարության դիրքորոշումը, որը մտահոգությամբ է հետևում Լաչինի միջանցքի շուրջ տեղի ունեցող զարգացումներին, ինչի մասին երկրի կառավարությունը տեղեկացրել է Ադրբեջանի իշխանություններին բարձրաստիճան պաշտոնյաների մակարդակով երկկողմ հանդիպման ժամանակ և կոչ է արել ապահովել ազատ և անվտանգ տեղաշարժ Լաչինի միջանցքով։ Պատասխանում նաև ասվում է, որ այդ հանդիպման ընթացքում, որը տեղի է ունեցել Ադրբեջանի դեսպանի խնդրանքով, ի թիվս այլ հարցերի, քննարկվել է նաև Լեռնային Ղարաբաղի հակամարտությունը։ Ընդգծվել է, որ քաղաքապետարանը պաշտպանում է Նիդերլանդների արտաքին գործերի նախարարության դիրքորոշումը, որը քննադատում է Ադրբեջանին։ Ֆոնկի հարցին, թե ինչպե՞ս է քաղաքապետարանը վերաբերվում դեսպանի այն հայտարարությանը, թե ողջ Հայաստանի օկուպացիան Ադրբեջանի իրավունքն է, քաղաքապետը պատասխանել է, որ ինքը չի կիսում այդ տեսակետը։
Նյութը հրապարակման պատրաստեց Կամո Խաչիկյանը
