Մալաթիայի տոնավաճառը կփակեն. Վարչախումբը կտրվել է իրականությունից

Քաղաքաշինության, հրդեհային և տեխնիկական անվտանգության տեսչական մարմինը որոշել է փետրվարի 1-ից կասեցնել Մալաթիա տոնավաճառի գործունեությունը, քանի որ տնտեսվարողը արձանագրված 17 խախտումներից մի քանիսը չի վերացրել։

Աչքի առաջ ունենալով Սուրմալուի ողբերգությունը, որը 17 մարդու կյանք խլեց, թերևս անհնարին է ասել, թե այս որոշումը ճշմարտացի չէ, սակայն խնդիրն ամենևին էլ արհեստականորեն, կամ մեկ գրիչի հարվածով 600-ից ավելի մարդկանց առանց գոյատևման հնարավորությունների թողնելն է։

Իշխանությունները Մալաթիայի տոնավաճառի գործունեությունը կասեցնելուց առաջ կարող էին նաև հնարավորություններ ստեղծել այդ մարդկանց իրենց առևտուրն այլ վայրերում իրականացնելու համար, կամ էլ որոշակի փոխհատուցում տային այդ անձանց, որոնք տարիներ շարունակ լուրջ ծախսեր են արել։ Եվ առևտրային կետեր են ստեղծել՝ իրենց հանապազօրյա հացը վաստակելու համար և այդ մարդիկ ամենևին էլ մեղավոր չեն, որ տոնավաճառի տնօրինությունը բավարար ջանքեր չի գործադրել հրդեհային անվտանգության բոլոր կանոնները պահպանելու։

Ի դեպ ուշագրավն այն է, որ այս օրերին լրագրողները, որոնք հանդիպում և զրուցում են Մալաթիայի տոնավաճառի առևտրականների հետ, փաստում են, թե նրանց մեծ մասը պարզապես շարունակում է իրեն պահել ջայլամի պես, թթու որևէ խոսք չեն ասում գործող իշխանությունների հասցեին, մինչդեռ նախկին իշխանությունների օրոք նման որոշումը կդառնար սոցիալական լայն ընդվզման և բողոքի ակցիաների առիթ։

Իսկ այսօր սեփական առևտրային կետը և գոյատևման միջոցները կորցնող մարդիկ որևէ կերպ չեն ցանկանում տեսնել փաշինյանական իշխանության մեղքը ստեղծված իրավիճակում։ Դրա փոխարեն 600 հոգին բավականին լուրջ ուժ էր կառավարության դիմաց բողոքի ակցիա անելու և իրենց համար առնվազն փոխհատուցում կամ այլ հնարավորություններ պահանջելու։

Հենց նման տարօրինակ որոշումների դեմ հանրության չընդվզելու հանգամանքն էլ հարուցում է իշախնությունների սանձարձակության նոր ալիք, վերջնականապես կտրվելով հանրությունից և մարդկանց խնդիրներից՝ նախկին սովածների այս խմբակը շարունակելու է լուրջ վնաս հասցնել ոչ միայն Հայաստանի Հանրապետությանը, այլև շարքային քաղաքացուն։

Քրիստինե Մուրադյան