«Մացոյի» սիրտը պաշտոն է ուզում. Փաշինյանի սրտի տխրահռչակ դատավորը

Սիրո և ջերմության այն բաժինը, որով Նիկոլ Փաշինյանը պարուրել է տխրահռչակ դատավոր Մնացական Մարտիրոսյանին, գնալով ավելի այլասերված դրսևորումներ է ստանում։

Քաղաքական բազմաթիվ գործերով հայտնի, նախկին ու ներկա բոլոր իշխանությունների ժամանակ ընդդիմադիրներին առանց աչքը թարթելու դատապարտող «Մացոն» հիմա էլ նշանակվել է Երևան քաղաքի ընդհանուր իրավասության դատարանի Կենտրոն և Նորք Մարաշ վարչական շրջանի նստավայրի նախագահի պաշտոնակատար։

Ի դեպ, օրենքի ուժով նախագահի հաստիքը թափուր մնալու ժամանակ նշանակվում է տարիքով ամենամեծ դատավորը։ Կենտրոնի նստավայրում տարիքով ավելի մեծ էր Գագիկ Պողոսյանը, սակայն նա կամ հրաժարվել է այդ պաշտոնից, կամ էլ մեր տեղեկություններով՝ ստիպել են հրաժարվել և դրանից հետո դատարանի նախագահի պաշտոնակատար է դարձել Մնացական Մարտիրոսյանը։

Կարճ ժամանակ առաջ էլ Մարտիրոսյանին առաջարկել էին Հակակոռուպցիոն դատարանի դատավորի պաշտոնում, խոսակցություններ էին շրջանառվում, թե անձամբ Նիկոլ Փաշինյանը նրան խոստացել է Հակակոռուպցիոն դատարանի նախագահի պաշտոնը, սակայն հասարակական կազմակերպությունների, իրավապաշտպանների և հանրության բուռն դժգոհության պայմաններում, Մարտիրոսյանը ստիպված եղավ դիմում գրել և հրաժարվել հակակոռուպցիոն դատարանի դատավորի պաշտոնից։

Այդուհանդերձ, տխրահռչակ դատավորի սիրտը պաշտոն էր ուզում և ի վերջո նրա համար հարմար մի բան են գտել՝ նշանակելով Կենտրոն և Նորք Մարաշ վարչական շրջանի նստավայրի նախագահի պաշտոնակատար։

Թերևս ավելորդ չէ նշել, որ նույն Մարտիրոսյանը ժամանակին դատել է հենց իրեն՝ Նիկոլ Փաշինյանին, այժմ էլ նրա վարույթում են գտնվում հասարակական-քաղաքական գործիչ Ավետիք Չալաբյանը, այլ ընդդիմադիրների դատաքննություններ, պրոդյուսեր Արմեն Գրիգորյանն էլ մահացավ հենց Մնացական Մարտիրոսյանի առաջին իսկ դատական նիստի ժամանակ։

Թերևս հարկ է արձանագրել, որ Փաշինյանն այնքան էլ անկեղծ չէ Մնացական Մարտիրոսյանի նկատմամբ իր սիրո դրսևորումներում, շատ «ավելի ճիշտ կլիներ», եթե նրան միանգամից Գլխավոր դատախազ , կամ Վճռաբեկ դատարանի նախագահ նշանակեին։

Մանասե Սարգսյան