Ո՞վ է պատասխանատու ադրբեջանական ահաբեկչության համար
ՎԵՐԼՈՒԾՈՒԹՅՈՒՆՆԵՐ
Նախօրեին երեկոյան հաղորդված ուրախ լուրը հաշված րոպեների ընթացքում վերածվեց մղձավանջի։
Հայաստանում 37 օր շարունակ գտնվող արցախցի մի խումբ երեխաների նախօրեին երեկոյան հաջողվել էր վերադարձնել Արցախ։
Նրանք այնտեղ էին վերադարձել ադրբեջանցիների հետ պայմանավորվածությունների արդյունքում ռուս խաղաղապահների մեքենաներով։ Արցախի մարդու իրավունքների պաշտպան Գեղամ Ստեփանյանը նշել էր, թե 19 երեխաների վերադարձը հարթ չի անցել։
Շուշի-Քարին տակ հատվածում, ճանապարհի շրջափակված հատվածում, որտեղ տեղակայված են էկոակտիվիստ ձևացող ադրբեջանական կառավարական գործակալները և նրանց սպասարկող լրագրողները, մեքենան կանգնեցվել է ադրբեջանցիների կողմից։ Այնուհետև մեքենային են մոտեցել քաղաքացիական հագուստով, դեմքերը փակած 10-15 ադրբեջանցիներ տեսախցիկներով, ոմանք ներխուժել են մեքենաներ և նկարահանել երեխաներին։
Ադրբեջանցիների ահաբեկումների հետևանքով մեքենայում իրարանցում է առաջացել, որի հետևանքով երեխաներից մեկն ուշագնաց է եղել։ Խաղաղապահները հեռացրել են մեքենայից ադրբեջանցիներին և երեխաներին տեղափոխել են Ստեփանակերտ։
Ադրբեջանցիների այս արարքը ոչ այլ ինչ է, քան ահաբեկչություն, նաև հնարավորություն հայկական կողմի համար այդ փաստերը ներկայացնելու միջազգային հանրությանը ևս մեկ անգամ փաստելու, թե ինչու Արցախը չի կարող լինել Ադրբեջանի կազմում։ Ալիևի վարչախումբը չի խորշում անգամ երեխաներին ահաբեկելուց։
Իհարկե այդ ամենն արվում է նպատակամղված և հետևողականորեն՝ Արցախում խուճապային տրամադրություններ տարածելու համար։ 37 օր շարունակ Ադրբեջանը չի կարողացել հասնել իր ուզածին և այժմ փորձում է ամենանուրբ լարերին հարվածել։
Այդուհանդերձ, Ադրբեջանին մեղադրելուց առաջ, հարկ է նաև մեղադրել երեխաներին Արցախ տեղափոխելու որոշում կայացնողներին։ Կարմիր խաչի միջազգային կոմիտեն հայտարարել է, թե իրենք որևէ կապ չունեն այս տեղափոխության հետ, և Հայաստանի ու Արցախի իշխանությունները պարտավոր են ժամ առաջ տեղեկացնելու թե ո՞ւմ հիվանդ երևակայության արդյունքն է եղել երեխաներին Արցախ տեղափոխելու որոշումը։ Անհապաղ պետք է պատժվեն այդ մարդիկ, որոնք գրեթե երկու տասնյակ երեխաների սթրեսի են մատնել։
Հասմիկ Մարգարյան
