Փաշինյանն Արցախի հետ խոսում է «հաթաթա»-ների լեզվով

Նիկոլ Փաշինյանի և նրա վարչախմբի ներկայացուցիչների կողմից վերջին օրերին հնչեցվող հայտարարությունները Արցախի վերաբերյալ այլևս որևէ կասկածի տեղիք չեն թողնում, որ գործող վարչախումբը ձեռքերը լվացել է Արցախից, ավելին՝ Արցախի և արցախցիների հետ փորձում է խոսել «հաթաթա»-ների լեզվով։

Նախօրեին Արցախի անվտանգության խորհրդի հնչեցրած քննադատությունը Հայաստանի վարչապետի հասցեին անպատասխան թողնել, իհարկե, Փաշինյանը չէր կարող։ Երեկ Կառավարության նիստում նա հայտարարել է, թե հավատում է, որ արցախցիների կամքն անկոտրուն է սեփական հայրենիքում ապրելու հարցում, սակայն բառերի մի ամբողջ կույտ է շարել, որը մեկ արտահայտությամբ կարելի է բնութագրել նույն Փաշինյանի նախկինում արած մեկ այլ էքսցենտրիկ բառով՝ «սսկվեք տեղներդ»։

Ըստ էության, ինչ է ասում Փաշինյանը. «Իմ ընկալմամբ Լեռնային Ղարաբաղի ժողովրդի և իշխանության արձագանքը պետք է լինի ասիմետրիկ, ինչ է սա նշանակում. Առաջին հերթին վերջին տարիների վերջին զարգացումների, դրանց խորքային իմաստների և պատճառների հետ պետք է առերեսվել այն կտրվածքով, որ իրադարձությունների, իրադրությունների մեր գնահատականները պետք է լինեն փաստահենք։ Այս առումով առաջին հերթին պետք է խուսափել իրադրություններն էլ ավելի փակուղային դարձնող քաղաքական հայտարարություններից, որովհետև վերջնակետին հասնելու հստակ պատկերացումներով չզուգորդված հայտարարությունները որևէ օգուտ չեն տալիս, և հետո, Լեռնային Ղարաբաղի և Ադրբեջանի միջև պետք է սկսվի քաղաքական խոսակցություն և Լեռնային Ղարաբաղի մեր գործընկերները պետք է հնարավորություն չտան, որ որևէ մեկն իրենց մեղադրի կառուցողական խոսակցությունը խափանելու, կամ նման խոսակցությունն անհանրին դարձնելու մեջ», - նշել է Փաշինյանը՝ ակնարկելով, թե Լաչինի միջանցքի փակումը սադրանք է, որի վերջնական նպատակը նոր ռազմական էսկալացիան է և չպետք է իրականացնել քայլեր, որոնք ցանկալի են ռազմական էսկալացիայի սցենարը մշակողների համար։

Ըստ էության Հայաստանի վարչապետի պաշտոնը զբաղեցնող անձը արցախցիներին կոչ է անում քաղաքական հայտարարություններ չանել, չհրահրել ադրբեջանցիներին ապրել գլուխը կախ, ինչը, իհարկե, լինելու բան չէ։ Փաշինյանին երկրորդել է Ազգային ժողովի նախագահ Ալեն Սիմոնյանը՝ հայտարարելով, թե Հայաստանը բնավ մտադիր չէ բանակցել Ադրբեջանի հետ Լաչինի միջանցքի բացման հարցով, կոչ է արել, որ այդ բանակցություններն իրականացնեն Արցախի իշխանությունները, իսկ Հայաստանի ղեկավարությունը միայն կաջակցի նրանց։

Փաստացի նշանակում է, որ Հայաստանի գործող իշխանությունները այլևս հրաժարվում են նույնիսկ կատարել իրենց տարրական պարտականությունները Արցախի նկատմամբ։ 

Արմեն Կիրակոսյան