«Փնթի կռուտիտներ և սրբագրելու փորձ». Նիկոլ Փաշինյանի ասուլիսը

«Փնթի կռուտիտներ և սրբագրելու փորձ». ահա այսպես կարելի է բնութագրել Հայաստանի վարչապետի աթոռը զբաղեցնող Նիկոլ Փաշինյանի՝ երեկ լրագրողների հետ դեմ առ դեմ ասուլիսի ընթացքը։ Երեկ՝ երեք ու կես ժամից ավելի, Նիկոլ Փաշինյանը փորձել է խուսանավել բոլոր հարցերից՝ հընթացս լրջագույն և վտանգավոր թեզեր շրջանառելով։ Մասնավորապես Փաշինյանը հայտարարել է, թե ՀԱՊԿ զորավարժություններ այս տարի Հայաստանում չեն կայանա։

Պաշտպանության նախարարը՝ նրա խոսքով, արդեն իսկ նամակ է ուղարկել ՀԱՊԿ-ին, նշել, թե այս իրավիճակում Հայաստանը նպատակահարմար չի համարում զորավարժությունների անցկացումը։ Փաշինյանի այս հայտարարությանն արձագանքել է ՌԴ նախագահի մամուլի քարտուղար Դմիտրի Պեսկովը, տարակուսած նշել, թե իրենք ստացել են Հայաստանի գրավոր դիմումը և այժմ քննարկում են, թե ինչպես պետք է վարվեն։

Փաշինյանն, ի դեպ, երեկ ստիպված է եղել մեկնաբանել իր անվտանգության խորհրդի քարտուղար Արմեն Գրիգորյանի արած մի հայտարարությունը, թե Հայաստանին պարտադրում են միութենական պետությանն անդամակցել։ Փաշինայնի խոսքով՝ պաշտոնական որևէ առաջարկ չի հնչել, իսկ անվտանգության խորհրդի քարտուղարը ամենայն հավանականությամբ փորձագետների հայտարարություններն ոչ պաշտոնական շփումներն է նկատի ունեցել։

Գրիգորյանը, հիշեցնենք, բավականին համոզված տոնով էր հայտարարել պարտադրանքի վերաբերյալ։ Նիկոլ Փաշինյանը երեկ նաև վերջնականապես լվացել է իր ձեռքերը Արցախից, հայտարարել, թե Լեռնային Ղարաբաղի ժողովուրդը պետք է բանակցի իրեն վերբերող հարցերով և ինքը որոշում կայացնի։ «Մենք պետք է զբաղվենք Հայաստանի հարաբերությունների հարցով, Լեռնային Ղարաբաղի ժողովուրդը և ժողովրդի ներկայացուցիչները պետք է զբաղվեն Լեռնային Ղարաբաղի հարցով, մենք էլ իրենց պետք է աջակցենք»,- ծոր է տվել Փաշինյանը։

Այդպես էլ մինչև վերջ պարզ չի դարձել, թե ինչի համար է վարչապետի աթոռը զբաղեցնող անձը չորս տասնյակից ավել լրագրողների հավաքել Կառավարության շենքում և ադրբեջանական թեզեր է շրջանառում։

Ըստ էության, բոլոր այն անձանց ակնկալիքները Փաշինյանից, թե նա որևէ լուրջ փոփոխություն է իրականացնելու Հայաստանում երեկ հօդս ցնդեցին, Նիկոլ Փաշինյանը ընդամենը մեկ խնդիր է լուծում՝ բացարձակ շահադիտական, սեփական անվտանգությունն ու հետագա պաշտոնավարումը շարունակելու հարցը, ցանկացած այլ հարց նրա համար գոյություն չունի։

Մանե Մսրյան