Նիկոլ Փաշինյանը առճակատման է գնում քաղհասարակության հետ
ՎԵՐԼՈՒԾՈՒԹՅՈՒՆՆԵՐ
Քաղաքացիական հասարակությունը մազերն է փետում, իրավապաշտպանները Նիկոլ Փաշինյանին մեղադրում են ոստիկանական բարեփոխումները ձախողելու մեջ։ Բանն այն է, որ երեկ նախագահ Վահագն Խաչատուրյանը ոստիկանապետի պաշտոնում Ներքին գործերի նախարարի պաշտոնում՝ Նիկոլ Փաշինյանի առաջարկով, նշանակել է ոստիկանապետ Վահե Ղազարյանին, իր դասընկերոջը։
Ամիսներ շարունակ լուրեր էին շրջանառվում, որ այդ պաշտոնում նշանակվելու են «Քաղաքացիական պայմանագիր» կուսակցության վարչության անդամներ, համենայնդեպս քաղաքական դեմքեր, որոնց հետ էլ սորոսական շրջանակներն ու արևմտյան կառույցները լուրջ հույսեր էին կապում, թե կկարողանան նրանց հետ պայմանավորվել իրենց իսկ նախաձեռնած բարեփոխումների շուրջ։
Պարզվեց՝ Փաշինյանը բնավ մտադիր չէ տուրք տալ արևմտյան կառույցների, նաև այդ իրավապաշտպանների պահանջներին և նշանակեց Վահե Ղազարյանին, ավելին՝ նույն Վահե Ղազարյանի պահանջով ոստիկանապետ է նշանակել նրա առաջին տեղակալ Արամ Հովհաննիսյանին, փրկարար ծառայության պետ էլ՝ մյուս տեղակալ Կամո Ցուցուլյանին։
Փրկարար ծառայության գործող պետը՝ Արմեն Գասպարյանը, որը նախկին ոստիկան էր և խնդիրներ ուներ Վահե Ղազարյանի հետ, լքելու է համակարգը։ Վահե Ղազարյանի նշանակումից հետո իրավապաշտպաններ Արթուր Սաքունցն ու Դանիել Իոաննիսյանը Նիկոլ Փաշինյանին մեղադրեցին բոլոր հնարավոր մեղքերի մեջ՝ այդ թվում նախաձեռնված բարեփոխումները ձախողելու, և հայտարարեցին, թե հասարակական կազմակերպությունները դադարեցնում են իրենց բոլոր խրագրերը՝ կապված ոստիկանության հետ։
Մեր տեղեկություններով՝ դադարեցնում է նաև իր բոլոր ծրագրերը Եվրամիության պատվիրակությունը։ Դեսպան Անրիա Վիկտորինը անձամբ էր լոբբինգ անում, որպեսզի ՆԳ նախարարի պաշտոնում նշանակվի քաղաքական որևէ անձ, որի հետ կկարողանան իրականացնել բարեփոխումների իրենց տեսլականը։ Այս պահին հայտնի է 30 միլիոն դոլարանոց ծրագրի մասին, որը, ըստ առկա տեղեկությունների, ընդհանրապես չեղարկվելու է, իսկ մյուս բոլոր նախաձեռնություննը՝ այդ թվում պարեկային ծառայության ներդրման մյուս մարզերում ևս հարցականի տակ են լինելու։
Իրավապաշտպանների բուռն արձագանքից կարելի եզրակացնել, որ ՆԳ նախարարի նշանակումը նրանց համար կարմիր գիծ է եղել և ամեն ինչ անելու են փաշինյանական իշխանությանը այս հարցում հարվածելու համար։
Ի դեպ չի բացառվում, որ արդեն 2023 թվականի զեկույցներում եվրոպական և միջազգային իրավապաշտպան կառույցները, ինչպես նաև պետությունները Հայաստանը ճանաչեն ոչ թե ազատ կամ մասամբ ազատ պետություն, այլ շնորհեն նույնիսկ ավտորիտար պետության կարգավիճակ՝ հոդս ցնդեցնելով Նիկոլ Փաշինյանի ժողովրդավարական բաստիոնի և ժողովրդավարության բրենդի մասին բոլոր խոսակցությունները։
Թերևս այդ ամենը քիչ է հետաքրքրում Փաշինյանին, նա ամեն ինչ անում է իր սեփական անվտանգությունը ապահովելու, Հայաստանն էլ ոստիկանապետության վերածելու ուղղությամբ։
Մանե Մսրյան
