Փաշինյանը համարձակվել է մեծ ասուլիս տալ. Թեժ է լինելու

Վարչապետ Նիկոլ Փաշինյանը վաղը հանդես կգա մամուլի ասուլիսով։

Կառավարությունը շտապել է «ավետել», թե ասուլիսը նախատեսված է լրագրողների մասնակցությամբ։ 44-օրյա պատերազմից հետո Փաշինյանը իր ասուլիսներն անցկացրել է առցանց ձևաչափով՝ Հանրային Հեռուստաընկերության եթերում ՝պատասխանելով միայն նախապես ստացված և ֆիլտրված հարցերին։

Սա թերևս առաջին անգամն է, երբ Փաշինյանը բացեիբաց պատասխանելու է լրագրողների հարցերին։

Ի դեպ, մեր տեղեկություններով՝ լրատվամիջոցների օպերատորներին այս անգամ էլ թույլ չեն տալու մտնել դահլիճ, փոխարենը Հանրային Հեռուստաընկերությունն ապահովելու է բաց հեռարձակում մի քանի տեսախցիկներով։ Մ

եր աղբյուրի փոխանցմամբ՝ փորձում են նաև ֆիլտրել ասուլիսին մասնակցող լրագրողներին, թեև հավատարմագրված են մոտ 4 տասնյակ լրատվամիջոց, սակայն Կառավարության լրատվության վարչությանը հանձնարարվել է առավել ընդդիմադիր տրամադրված լրատվամիջոցների լրագրողներին պարզապես ներս չթողնել, կամ էլ նախապես չհավատարմագրել։

Փոխարենը ասուլիսին պետք է մասնակցեն և նախապես ծրագրված հարցեր ներկայացնեն իշխանական և մերձիշխանական լրատվամիջոցների ներկայացուցիչները, որպեսզի տպավորություն ստեղծվի, թե Փաշինյանը պատասխանում է բոլոր ԶԼՄ-ներին և հանրությանը հուզող հարցերին։

Դրական է, որ Նիկոլ Փաշինյանն ի վերջո համարձակվում է պատասխանել մեծ թվով լրագրողների հարցերին, սակայն նախկինում՝ մինչ պատերազմը, թե՛ Փաշինյանը, թե՛ դրանից առաջ նախկին իշխանությունները երբեք էլ թաքնված չեն եղել, և հարցազրույցներից բացի երկրի ղեկավարները նաև մեծ ասուլիսներ են կազմակերպել, որոնց մասնակցել են բոլոր ցանկացող լրատվամիջոցների ներկայացուցիչները, ուստի և Փաշինյանը, թերևս այս անգամ, վախենալով միջազգային արձագանքից, փորձում է այժմ էլ իր արևմտյան գործընկերներին հերթական անգամ թոզ փչել ժողովրդավարության բաստիոն լինելու իր ժամկետանց թեզերով, համոզելու, թե չի քաշվում լրագրողների ներկայությունից։

Իսկ ասուլիսը վստահաբար բավականին թեժ է լինելու, որքան էլ Փաշինյանը և նրա թիմը ձգտեն կրճատել անցանկալի լրագրողների ներկայությունը, այդուհանդերձ, նրան տրվող բավականին սուր հարցեր են կուտակվել, որոնք պարտադիր հնչեցվելու են։ 

Աննա Նադոյան