ՀՀ դիվանագիտական կորպուսը սաբոտա՞ժ է անում
ՎԵՐԼՈՒԾՈՒԹՅՈՒՆՆԵՐ
27 օր շարունակ Արցախը շրջափակման մեջ է, և Սփյուռքի հայկական կառույցները, Արցախի իշխանությունները, հայ ժողովրդի մի ստվար զանգվածը, ակտիվ քաղաքացիներ ամեն ինչ անում են, որպեսզի բարձրացնեն Արցախի ձայնը աշխարհում, ներկայացնեն իրավիճակը, առաջադեմ մարդկության կողմից Ադրբեջանի դատապարտման հայտարարություններ ստանան։
Տարօրինակ կերպով գրեթե պարապուրդի է մատնված Հայաստանի դիվանագիտական կորպուսը։ Հատուկենտ դեսպաններ, որոնց աշխատանքը երևում է և որոնք իսկապես գործ են անում՝ ներկայացնելով ստեղծված իրավիճակը։ Հիմնականում հայկական դիվանագիտական ներկայացուցչությունների աշխատանքի մասին ընդհանրապես որևէ տեղեկություն չի շրջանառվում։
Տարօրինակ է, որ Արցախի շրջափակման վերաբերյալ Հռոմի պապի երկու ուղերձում որևէ բառ այդպես էլ չլսեցինք, թե՛ կաթոլիկների սուրբծննդյան դեկտեմբերի 24-ի ուղերձում Հռոմի պապը չանդրադարձավ Արցախին և թե՛ նախօրեին, հայ առաքելական եկեղեցու կողմից նշվող Սուրբ ծնունդի օրը, Հռոմի սրբազան քահանայապետը որևէ բառ չասաց, փոխարենը բավարարվեց Ուկրաինայի և աշխարհի այլ թեժ կետերում ընթացող պատերազմները դատապարտելու գործողություններով։
Նախկին իշխանությունների օրոք Հռոմի պապն, օրինակ, բազմիցս Հայաստանին և Արցախին աջակցության խոսքերով է հանդես եկել։ Խնդիրը միայն Վատիկանում ՀՀ դեսպանությունը չէ, բազմաթիվ երկրներում հայ դիվանագետների աշխատանքը պարզապես չի երևում։
ԱԳՆ մեր աղբյուրի փոխանցմամբ՝ այս վարքը ավելի շուտ նման է սաբոտաժի՝ ընդդեմ ԱԳ նախարար Արարատ Միրզոյանի։ Գաղտնիք չէ, որ ԱԳՆ աշխատակազմը և Հայաստանի դիվանագիտական ներկայացուցչությունները լուրջ անձնական խնդիր ունեն Արարատ Միրզոյանի և նրա խորհրդականների հետ և ամեն ինչ անում են, որպեսզի նսեմացնեն նրա աշխատանքը, ցույց տան, թե արտգործնախարարությունը բացարձակ ոչնչով չի զբաղվում։ Ուստի և շատ դեպքերում դիվանագետները պարզապես մատը մատի չեն տալիս, որպեսզի կուժն ու կուլան ջարդվի հենց Միրզոյանի գլխին։
Մարիաննա Վարդանյան
