Լոս Անջելեսի իշխանությունները Բայդենին հորդորել են Արցախում ռուսական զորքերը փոխարինել միջազգային խաղաղապահներով
ՎԵՐԼՈՒԾՈՒԹՅՈՒՆՆԵՐ
Realtribune.ru–ն գրում է, որ Լոս Անջելեսի քաղաքապետ Կարեն Բասը և Լոս Անջելեսի քաղաքային խորհրդի նախագահ Փոլ Կրեկորյանը դիմել են ԱՄՆ նախագահ Ջոզեֆ Բայդենին կապված «Ռուսաստանի և Ադրբեջանի կողմից Արցախի անօրինական շրջափակման հետ»։ «Այս ծավալվող հումանիտար աղետը ռուսական զորքերի աջակցությամբ, որոնք ըստ էության պատանդ են պահում Արցախի ժողովրդին, Ադրբեջանի բռնապետ Ալիևի կողմից հրահրված կանխամտածված շրջափակման արդյունքն է։
Այս ապօրինի շրջափակման միջոցով այս երկու բռնապետությունները ձգտում են պատժել Արցախին և Հայաստանին տարածաշրջանում ժողովրդավարության և կայունության հաստատման համարձակության համար: Դրանից ավելի վատն այն է, որ ԱՄՆ-ի կողմից վճռական գործողությունների բացակայության դեպքում աշխարհը կարող է շուտով ականատես լինել մեկ այլ Սրեբրենիցայի կամ Սարաևոյի և, ի վերջո, տարածաշրջանում ողջ հայկական ներկայության ցեղասպանական ոչնչացման»,- ասվում է նամակում։
Բասը և Կրեկորյանը հիշեցրել են, որ «դեկտեմբերի 12-ից ռուսական «խաղաղապահ» զորքերը, որոնց հանձնարարվել է վերահսկել Լաչինի միջանցքը՝ Արցախի միակ փրկօղակը Հայաստանի և մնացած աշխարհի համար, թույլ են տվել Ադրբեջանին արգելափակել այն և դրանով իսկ դադարեցնել սննդի, վառելիքի, դեղորայքի և այլ մարդասիրական բեռների հասանելիությունը»։
«Դպրոցները ստիպված են փակվել, խանութների դարակները դատարկ են, իսկ հիվանդանոցները չեն կարողանում դեղորայք ձեռք բերել կամ կյանք փրկող ընթացակարգեր իրականացնել: Չկա 350 ծանր հիվանդների Հայաստան շտապ օգնության տեղափոխման միջոց, ինչն արդեն իսկ հանգեցրել է մեկ մարդու մահվան և շատերի մահվան կհանգեցնի, եթե շրջափակումը չվերացվի»,- նշել են ամերիկացի քաղաքական գործիչները։
Բասը և Կրեկորյանը ԱՄՆ–ի նախագահին կոչ են արել «ուղղակիհումանիտար օգնություն ցուցաբերել Արցախին, ներառյալ սննդամթերք և դեղամիջոցներ», «հասկացնել Պուտինին ու Ալիևին, որ ԱՄՆ–ը պահանջելու և գործելու է, որպեսի ապահովվի օգնություն ցուցաբերելու համար թռիչքներ Արցախ», «պնդում է Արցախում ռուսական զորքերի փոխարինումը միջազգային խաղաղապահներով», «համառորեն նպաստում է Բաքվի և Ստեփանակերտի միջև բանակցություններին Արցախի հայ բնակչության իրավունքներն ու անվտանգությունը երաշխավորելու համար», ինչպես նաև պետք է «համաձայն Ազատության աջակցության ակտի և Մագնիտսկու օրենքի շոշափելի միջոցներ ձեռնարկել Ադրբեջանի վարչակարգի դեմ իր հանցագործությունների համար նրան պատասխանատվության ենթարկելու համար»:
Նյութը հրապարակման պատրաստեց Կամո Խաչիկյանը
