Թուրքիան ավելացնում է ճնշումները Հայաստանի վրա
ՎԵՐԼՈՒԾՈՒԹՅՈՒՆՆԵՐ
Թուրքիան ավելացնում է ճնշումները Հայաստանի վրա։ Թուրքիայի արտգործնախարար Մևլույթ Չավուշօղլուն անդրադարձել է Լաչինի միջանցքի շրջափակմանը և հայ-ադրբեջանական հարաբերություններին, հայտարարել, թե Լաչինի միջանցքի վերջին իրադարձությունները Հայաստանի համար անկեղծության փորձություն կլինեն, նա հայտարարել է, թե անթույլատրելի է ադրբեջանի հարստություններն իր տարածքում յուրացնելու փորձը։
Չավուշօղլուն հարստությունների յուրացման փորձ է անվանում Արցախի տարածքում գտնվող հայկական հանքերի շահագործումը։ Հայ-թուրքական և հայ-ադրբեջանական հարաբերություններին է անդրադարձել նաև Թուրքիայի հատուկ ներկայացուցիչ, դեսպան Սերդար Քըլըչը, որ Անկարայի համալսարանում Թուրքիա-Հայաստան հարաբերությունները դիվանագետ Սերդար Քըլըչի աչքերով համաժողով է կայացրել, որտեղ դեսպանը հայտարարել է, թե փոխադարձ ըմբռման և Հայաստանի ու Ադրբեջանի երկարաժամկետ շահերը հաշվի առնելու պարագայում կհաղթահարվեն առկա խնդիրները, նա կրկին հայտարարել է, թե անհնար է հայ-թուրքական գործընթացը տարանջատել հայ- ադրբեջանական գործընթացից։
Միևնույն ժամանակ Սերդար Քըլըչը պնդել է, թե Հայաստանի կողմից հատուկ բանագնաց Ռուբեն Ռուբինյանի միջոցով փորձում են կարգավորել հարաբերությունները, առարկայական քայլեր են կատարում բեռնափոխադրումների վերսկսելու վերաբերյալ, առաջիկայում էլ այլ քայլեր են կատարելու։
Ըստ Քըլըչի, եթե Հայաստանում ժողովրդի կենսամակարդակի բարձրացում և բարգավաճում է ակնկալվում, ապա դրա ուղին Թուրքիա- Հայաստան հարաբերությունների կարգավորումն է և այդ հարաբերությունների կարգավորման դեպքում, ըստ դեսպանի, Հայաստանին շռնդալից տնտեսական հաջողություններ են սպասվում։
Մի կողմից մտրակի, մյուս կողմից բլիթի քաղաքականություն վարելով՝ Թուրքիան փորձում է Հայաստանից ստանալ առավելագույնը, ճնշումներով պարտադրել ընդունել թուրք-ադրբեջանական տանդեմի քաղաքական նպատակները։ Եվ, ըստ էության, բայց միևնույն ժամանակ շարունակում է նաև աջակցել Ադրբեջանին Հայաստանի և Արցախի դեմ շրջափակման և քաղաքական ու ռազմական ճնշումների հարցերում։
Արտակ Փիրուզյան
