Փաշինյանը բարձրացնում է հակառուսականության նշաձողը

Կառավարության նիստում վարչապետի պաշտոնը զբաղեցնող Նիկոլ Փաշինյանը հերթական հակառուսական հայտարարություններ է արել։

«Եթե Ռուսաստանը օբյեկտիվ կամ սուբյեկտիվ պատճառներով չի կարողանում ապահովել կայունությունն ու անվտանգությունը Լեռնային Ղարաբաղում, ինքը պիտի քննարկում նախաձեռնի ՄԱԿ-ի անվտանգության խորհրդում և ռուսական խաղաղապահ զորախմբին ՄԱԿ-ի անվտանգության խորհրդի մանդատով օժտելու, կամ Լեռնային Ղարաբաղ լրացուցիչ բազմազգ խաղաղապահ զորխումբ ուղարկոլու հարց բարձրացնի»,- նշել է Փաշինյանը։ Ըստ էության, Հայաստանի վարչապետի այս հակառուսական հայտարաությունը, ինչպես և սպասվում էր, արժանացել է ռուսական կողմի բավականին կոշտ գնահատականին։

Եթե Ռուսաստանի նախագահի մամուլի քարտուղար Պեսկովը բավականին նրբանկատ է գտնվել և ընդամենը շեշտել է, որ Ռուսաստանը շարունակում է աշխատել կողմերի հետ և ապահովել անվտանգությունը, ապա ՌԴ ԱԳՆ պաշտոնական ներկայացուցիչ Մարիա Զախարովայի արձագանքն ավելի քան կոշտ էր։

«Նման բաներ ասելն ու հայտարարելը պարզապես իրողությունները չհասկանալ է նշանակում»,- հայտարարել է Զախարովան Հայաստանի վարչապետին՝ ըստ էության մեղադրելով իրականությունից կտրված լինելու մեջ։

«Ես կարող եմ նույն հարցը տալ, իսկ առանց Ռուսաստանի Դաշնության խաղաղապահ զորախմբի ինչ–որ մեկը կարո՞ղ է ամենայն պատասխանատվությամբ ասել, որ ավելի լավ կլինի, կարծում են պատասխանն ակնհայտ է, հետևաբար որքան ուզեք կարող եք խոսել արդյունավետության բարձրացման մասին, ես ևս մեկ անգամ կրկնում են, որ բոլորն այժմ աշխատում են այս իրավիճակի հանգուցալուծման ուղղությամբ»,- նշել է Զախարովան, միևնույն ժամանակ նշել, թե Ռուսաստանը դաշնակցային պարտականություններ ունի թե՛ Հայաստանի և թե Ադրբեջանի նկատմամաբ և փորձում է, բոլոր ուղղություններով համակարգված աշխատելով, շտկել իրավիճակը։

Զախարովայի նման նյարդային արձագանքը վկայում է, որ ՌԴ ԱԳՆ –ն բավական կոշտ քաղաքական կուրս է վերցրել Հայաստանի հետ հարաբերություններում, իսկ Նիկոլ Փաշինյանի վերջին հակառուսական քայլերը արդեն սկսել են նյարդայնացնել ռուսական կողմին, ինչը կարող է լուրջ հետևանքներ ունենալ։ 

Գայանե Թանդիլյան