Արցախցիների կամքն ու աշխատանքը ձախողում են Ադրբեջանի պլանները
ՎԵՐԼՈՒԾՈՒԹՅՈՒՆՆԵՐ
Ադրբեջանն արդեն ութերորդ օրն է՝ շարունակում է փակ պահել Արցախի կյանքի ճանապարհը։ Ութ օր շարունակ Արցախի մեր հայրենակիցները զրկված են արտաքին աշխարհի հետ կապից և հումանիտար ճգնաժամը արդեն սկսում է զգացնել տալ իրեն։
Այդուհանդերձ Արցախի իշխանությունների բավական ակտիվ և նպատակային քաղաքական արդյունքում, դրա հետևանքներն այնքան էլ լուրջ չեն զգացվում, ավելին իշխանությունները նաև կարողացել են կանխել բացասական երևույթները, գների աճը։ Ստեփանակերտում մեկ դեղատուն փոքր-ինչ բարձրացրել էր մի քանի առաջին անհրաժեշտության դեղերի գները, և մրցակցությունը պաշտպանող հանձնաժողովը պետնախարար Ռուբեն Վարդանյանի հանձնարարությամբ անհապաղ միջամտել, կանխել և պատժել է դեղատանը։
Հանձնաժողովը նաև դիտարկումներ է անցկացրել Ստեփանակերտի հինգ տասնյակից ավելի խանութներում և որտեղ գների բարձրացման փոխարեն ընդհակառակը գների իջեցում է արձանագրել, ինչը վկայում է, որ արցախցիները պատրաստ են ճգնաժամային իրավիճակում ապրելու և կարողանում են շատ արագ ինքնակազմակերպվել։
Այդուհանդերձ ադրբեջանական այս սադրանքները լրջագույն ազդեցություն են ունենում, 8 օրվա ընթացքում Ադրբեջանի գործողությունները դատապարտել են բազմաթիվ երկրներ և կազմակերպություններ, սակայն թշնամին առայժմ մտադիր չէ որևէ կերպ հետ քաշվել, ընդհակառակը, ադրբեջանցի «բնապահպանները» նորանոր պահանջներ են ներկայացնում, որոնք որևէ կապ չունեն բնապահպանության հետ։
Ըստ էության, Բաքուն գիտակցում է, որ իր այս քայլերը ձախողվել են և լուրջ հակազդեցության արժանացել։ Միաժամանակ փորձում է ձգել և ահաբեկել արցախցիներին՝ մտածելով, թե այս կերպ կարող է հասնել իր ուզածին, ինչը թերևս բացառված է։ Արցախի մեր հայրենակիցները շատ ավելի լուրջ են տրամադրված և պատրաստ են տանելու զրկանքները։
Մինաս Ավագյան
