Ինչ ծրագիր է իրականացնում Փաշինյանը. ռուս խաղաղապահների մանդատը կփոխվի՞
ՎԵՐԼՈՒԾՈՒԹՅՈՒՆՆԵՐ
Արցախի ԱԳ նախարարի պաշտոնը զբաղեցնող Դավիթ Բաբայանն այսօր կրկին հայտարարել է, որ Արցախում ռուս «խաղաղապահներին» պետք է ՄԱԿ-ի մանդատ տրվի։ «Որպեսզի ՌԴ խաղաղապահներն իրենց գործն անեն, պետք է ավելի մեծ թիվ կազմեն, ունենան ավելի լայն լիազորություններ, ՄԱԿ-ի կողմից մանդատ։ Մեր ուզածը սա է։ Չենք ուզում մտնել գերտերությունների պայքարի մեջ»,- ասել է նա։
Ուշագրավ է, որ ընդամենը օրեր առաջ էլ Հայաստանի ԱԽ քարտուղար Արմեն Գրիգորյանը, անդրադառնալով ՀՀ-Ադրբեջան «խաղաղության պայմանագրի» նախապատրաստական աշխատանքներին, հայտարարել է, որ դեռեւս վերջնական որոշում չկա՝ արդյոք խաղաղության պայմանագրով է Լեռնային Ղարաբաղի հիմնահարցը լուծվելու կամ փորձ արվելու լուծելու, թե՞ մենք առանձին միջազգային մեխանիզմն ենք ստեղծելու:
Միևնույն ժամանակ Գրիգորյանը հայտարարել է, որ այս պահի դրությամբ առկա է խաղաղության պայմանագրի ռուսական և ադրբեջանական տարբերակները, Արևմուտքը խաղաղության պայմանագրի իր տարբերակը առաջ չի քաշել: Ստացվում է, որ իշխանությունները փորձում են խուսափել ռուսական տարբերակից, ասել է թե՝ խաղաղության պայմանագրի կնքումից և անցում կատարել արևմտյան տարբերակին, որն էլ իր հերթին ենթադրւմ է ինչ-ինչ միջազգային մեխանիզմների ներդրում:
Այս թեզը, ի դեպ, առաջ քաշեց նաև ԱԳՆ նախկին նախարար Զոհրաբ Մնացականյանը, ով վերջերս աչքի է ընկնում իր հակառուսական թվիթներով: «Արցախը կտրված է Հայաստանից և աշխարհից. Արցախից Հայաստան տանող միակ ճանապարհը փակել են ադրբեջանցիները: Ահա թե ինչպես է նյութականացվում Արցախի ժողովրդին սպառնացող գոյաբանական սպառնալիքը: Ահա թե ինչպես է մարմնավորվում ցեղասպանական միտումի նախազգուշական նշանը։ ՄԱԿ ԱԽ-ի կողմից շտապ գործողությունների ժամանակն է»,- գրել է նա:
Սրան զուգահեռ Արցախի ԱԳՆ-ն պահանջում է մեծացնել ռուսական խաղաղապահ կոնտինգենտի քանակը և առաքելությանը միջազգային կարգավիճակ շնորհել։
Ինչպես երևում է վերջին իրադարձություններից և ԱԳՆ շեշտադրումներից, որոնք ստանում են իշխանական պրոպագանդայի աջակցությունը և ակտիվորեն շրջանառվում նրանց կողմից, ՀՀ իշխանությունները, որոնք իբրև թե բրյուսելյան բանակցություններից վերադարձել են բանակցությունների ռուսական դաշտ, բարձրացնելու են Արցախում խաղաղապահ առաքելության միջազգայնացման հարցը ՄԱԿ ԱԽ-ի միջոցով:
Սակայն, մեծ հարց է՝ արդյոք ՄԱԿ-ը պատրաստ է ՌԴ խաղաղապահ ուժերին միջազգային մանդատ տալ՝ հատկապես հաշվի առնելով ՌԴ-արևմուտք առկա բացահայտ թշնամական հարաբերությունները: Որքանով է դա ընդհանրապես բխում Արևմուտքի շահերից: Թերևս ավելի հավանական է, որ խոսքը իրականում ոչ թե միջազգային մանդատ տալու, այլ ռուս խաղաղապահներին միջազգային խաղաղապահ զորախմբով փոխարինելու մասին է: Սա իր հերթին նշանակում է ՌԴ դուրս մղում Արցախից, իսկ այնուհետև նաև տարածաշրջանից, իսկ Արցախի բնակչության համար դրանով անվտանգության որևէ երաշխիքներ, միևնույն է, չեն ստեղծվելու:
