Արցախում իրավիճակը սրվել է, իսկ Հայաստանի իշխանությունը անհաղորդ է
ՎԵՐԼՈՒԾՈՒԹՅՈՒՆՆԵՐ
Ինչպես և սպասվում էր Ադրբեջանը հերթական սադրանքը իրականացրեց Ստեփանակերտ Շուշի ճանապարհին։ Մի խումբ ադրբեջանցիներ տարբեր «բնապահպանական» տարբերանշաններով, նախկին զինվորականների մասնակցությամբ դուրս են եկել ճանապարհի վրա և մինչ այս պահը փակ են պահում այն, գրեթե մեկ ամբողջ օր։
Բանակցությունները ռուս խաղաղապահների, ինչպես նաև Արցախի ներկայացուցիչների միջև որևէ արդյունք չեն տվել։ Նույնիսկ Ռուսաստանի նախագահ Վլադիմիր Պուտինը հեռախոսազրույցներ է ունեցել Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի հետ, քննարկել են Լաչինի միջանցքում ստեղծված իրավիճակի հանգուցալուծմանը վերաբերող հարցեր։ Հայաստանի և Արցախի իշխանությունները տարբեր հայտարարություններ են տարածել՝ ներկայացնելով թե՛ ստեղծված իրավիճակը և թե՛ դիմելով միջազգային հանրությանը ջանքեր գործադրել ռուս խաղաղապահներին էլ ավելի խիստ վերաբերվել եռակողմ հայտարարությունների պայմանները խախտող ադրբեջանցիների նկատմամբ։
Ադրբեջանական կողմը, սակայն, ինչպես և սպասելի էր բնավ էլ մտադիր չէ զիջել, ավելին Ադրբեջանի պետական հեռուստատեսությունը ռուս խաղաղապահների գործունեությունն անհեթեթություն է անվանել և հայտարարել, թե իրենք պատրաստվում են շարունակել արգելափակել Արցախը սնուցող հիմնական ճանապարհը ՝ իրենց նպատակներին հասնելու համար։ Արտաքուստ բնապահպանական կոչերով հանդես եկող ադրբեջանցիներն իրականում մի քանի նպատակ են հետապնդում՝ նախ ահաբեկել արցախի բնակչությանը, ստիպել նրանց դուրս գալ իրենց տներից և հեռանալ և երկրորդ՝ ճնշում բանեցնելով Հայաստանի իշխանություների նկատմամբ հասնել «Զանգեզուրի միջանցքը» տրամադրելու իրենց պահանջներին։
Հայկական կողմը, որ հերքում է իբր Զանգեզուրի միջանցքը տալու պայմանը, հայտարարում է, թե կարող է բացել կոմունիկացիաները հայկական ինքնիշխան իրավասության ներքո։ Դեռևս նախորդ օրը, երբ պետնախարար Ռուբեն Վարդանյանի և Կաշենի, Դրմբոնի հանքավայրերի աշխատակիցների ջանքերի շնորհիվ հաջողվեց կանխել ադրբեջանական մեկ այլ սադրանք, մենք կարծիք էինք հայտնել, որ Ադրբեջանը գնալու է նոր սադրանքի։
Թշնամին չուշացավ և շարունակում է նպատակամղված առաջ տանել իր օրակարգը, իսկ թե ինչ է անում Հայաստանի իշխանությունը Ազգային ժողովում բուֆետ բացելուց և տոնածառի լույսերը վառելուց բացի, որևէ մեկը չգիտի։ Հատուկենտ հայտարարություններից, անատամ արձանագրումներից զատ փաշինյանական վարչախումբը ոչինչ չի ձեռնարկում Արցախում շրջափակման մեջ մնացած մեր 120 հազար հայրենակիցների շահերը պաշտպանելու հարցում։ Դավաճանությունը պոզով-պոչով չի լինում։
Աննա Նադոյան
