Ադրբեջանը օրեցօր նորանոր սադրանքներ է իրականացնում Արցախում

Ադրբեջանը օրեցօր նորանոր սադրանքներ է իրականացնում Արցախում և այդ ամենը համեմում է միջազգային իրավունքին հղումներով, բողոքի նոտաներով և տարատեսակ քարոզչական միջոցներով։ Երեկ Բաքուն նոտա է հղել Մոսկվային՝ կոչ անելով ռուսական կողմին ձեռք բերված պայմանավորվածություններին համապատասխան ապահովել Ադրբեջանի ներկայացուցիչների անարգել մուտքը Արցախում գտնվող հանքավայրեր մոնիթորինգի համար։

ԱԳՆ պաշտոնական ներկայացուցիչ Այխան Հաջիզադեի խոսքով՝ նոտայում ընդգծվում է «Ռուսական խաղաղապահ կոնտինգենտի կողմից Ադրբեջանի ինքնիշխանության և տարածքային ամբողջականության ղարաբաղյան շրջանում իր գործունեության խստիվ պահպանության անհրաժեշտությունը»։

Հիշեցնենք, Արցախի հանքարդյունաբերական կազմակերպության աշխատակիցները, համայնքների բնակիչները նախօրեին ինքնաբուխ կերպով խափանել էին ադրբեջանական սադրանքը, արգելափակել ադրբեջանցի «բնապահպանների» մուտքը Դրմբոնի և Կաշենի հանքավայրերի տարածք։ Ընդ որում, ադրբեջանական կողմը հաղորդագրություն էր տարածել, թե նախապես պայմանավորվածություն են ունեցել ռուսական խաղաղապահ զորակազմի հրամանատարության հետ՝ հանքավայրեր այցելություն իրականացնելու համար, և իբր Անդրեյ Վոլկովի գլխավորած զորակազմը մեկ անգամյա այցելության թույլտվություն է տվել։

Շնորհիվ Արցախի պետնախարար Ռուբեն Վարդանյանի և Արցախի բնակիչների զգոնության՝ հաջողվել է սադրանքը խափանել, մինչդեռ հարկ է նշել, որ սա ոչ առաջինն է, ոչ էլ վերջինն է լինելու ադրբեջանական կողմի սադրանքների զինանոցում։ Հատկապես հանքավայրերի հետ կապված Ադրբեջանը բավականին ուշագրավ մարտավարություն է որդեգրել՝ փորձելով միջազգային հանրությանը համոզել, թե Արցախի բնակիչները հանքավայրերը շահագործում են ապօրինի կերպով, ուստի և ամեն ինչ անելու են, հիմա էլ քարոզչական այս թեզն առաջ մղելու համար։

Եվ բնականաբար Արցախի մեր հայրենակիցների կյանքն ու անվտանգությունը լրջորեն վտանգի տակ է։ Միջազգային հանրությունը առայժմ որևէ արձագանք չի արել ադրբեջանական այս սադրանքի կապակցությամբ, ինչը կարող է նշանակել, որ թե՛ Արևմուտքում, թե՛ Ռուսաստանում առանձննապես դժգոհ չեն Ադրբեջանի կատարած քայլերից, որևէ արձագանք չկա նաև Հայաստանի իշխանություններից, նրանք ջայլամի պես գլուխները թաղել են ավազի մեջ՝ մյուս մարմնամասերը անպաշտպան թողնելով թշնամու առաջ։ 

Կարինե Աբրահամյան