«Հայաստան» դաշինքում հրաժարականների շքերթ է

Հայաստանի ընդդիմադիր ամենամեծ ուժի՝ «Հայաստան» դաշինքի վերջին օրերին տեղի ունեցող իրադարձությունները առայժմ դուրս են տրամաբանությունից, իսկ խմբակցության ներկայացուցիչները որևէ կերպ չեն մեկնաբանում իրավիճակը։

Հիշեցնենք՝ առնվազն 4 պատգամավորներ հրաժարվել են մանդատից. փաստաբան Արամ Վարդևանյանը, «Վերածնվող Հայաստան» կուսակցության նախագահ Վահե Հակոբյանը, կուսակցության փոխնախագահներ Ելենա Կիրակոսյանն ու Հռիփսիմե Ստամբուլյանը։ Դաշինքի ընտրական ցուցակում ընդգրկված հաջորդ անձանցից որոշները ևս հրաժարվել են մանդատից, ավելի վաղ իր հրաժարականի մասին էր նշել ԵՊՀ արևելագիտության ֆակուլտետի դեկան Ռուբեն Մելքոնյանը։

Երեկ ևս 3 թեկնածուներ հայտարարել են, թե չեն վերցնելու մանդատը և համապատասխան դիմումներ են ներկայացրել Կենտրոնական ընտրական հանձնաժողով։ Եթե «Վերածնվող Հայաստան» կուսակցության անդամ Մարիա Պետրոսյանի հրաժարականը հասկանալի է, կուսակցությունը ընդհանրապես դուրս է եկել «Հայաստան» դաշինքի կազմից և դրել իր մանդատները, իսկ որոշ պատգամավորներ էլ հրաժարվել են դնել մանդատը և լքել են կուսակցությունը, ապա իրենց մանդատներից հրաժարված 2 անձանց պարագան փոքր ինչ այլ է։

Ոստիկանության պաշտոնաթող գնդապետ Սայաթ Շիրինյանը, հայտնի մուլտիպլիկատոր Դավիթ Սահակյանցը ևս հրաժարվել են մանդատներից, ընդ որում երկուսի տարածած հայտարարությունները գրեթե նույնաբովանդակ են և որոշակի նեղսրտվածություն է նշմարվում իրենց դաշինքի գործողությունների նկատմամբ։ Շատ փորձագետներ նշում են, թե թեկնածուները հրաժարվում են իրենց մանդատներից , որպեսզի այն բաժին հասնի ընտրական ցուցակի 50-րդ տեղում հանգրվանած Լևոն Քոչարյանին։

Առաջիկայում Երևանի քաղաքապետի ընտրություններ են սպասվում և չի բացառվում, որ «Հայաստան» դաշինքը ընտրություններին մասնակցի հենց Լևոն Քոչարյանի գլխավորությամբ, իսկ պատգամավորական մանդատը նրան հնարավորություն կտա առնվազն մինչև 2023 թվականի աշուն, երբ տեղի է ունենալու ընտրությունները, օգտագործել քաղաքական գլխավոր ամբիոնը՝ սեփական վարկանիշը բարձրացնելու համար։

Տաթև Հախնազարյան