Տհաճ քայլ փաշինյանական վարչախմբի կողմից․ ընտանիք մտնելը հայեցի չէ

Հայաստանի գլխավոր դատախազությունը հանրային քրեական հետապնդում է նախկին ոստիկանապետ Վլադիմիր Գասպարյանի կնոջ նկատմամբ։ Ըստ գործի տվյալների՝ Վլադիմիր Գասպարյանի կինը՝ Սուսաննա Գասպարյանը, 2000-ից 2011 թվականներին պաշտոն է զբաղեցրել ՊՆ ռազմական Ոստիկանությունում, 2011-ից-2018 թվականներին էլ ՀՀ Ոստիկանությունում, պարբերաբար չի ներկայացել ծառայության և չի կատարել ծառայողական պարտականությունները։

Առաջին դեպքում Սուսաննա Գասպարյանին վճարվել է ընդհանուր 17 միլիոնից ավելի դրամ, երկրորդ դեպքում՝ 19 միլիոն դրամից ավելի գումար։ Գասպարյանը տեղյակ լինելով այս պայմաններից՝ իր կնոջը շնորհել է փոխգնդապետ, ապա՝ գնդապետ կոչումները։ Օրեր առաջ էլ գլխավոր դատախազությունը հանրային քրեական հետապնդում էր հարուցել Վլադիմիր Գասպարյանի դստեր՝ Յուլիա Գասպարյանի նկատմամբ։

Վերջինս ևս մի քանի տարի աշխատելով Ոստիկանությունում՝ ծառայության չի ներկայացել, փոխարենը ստացել է 8 միլիոն դրամից ավելի գումար։ Ամենևին չենք ցանկանում խախտել անմեղության կանխավարկածը, նաև չենք ցանկանում կասկած հայտնել գլխավոր դատախազության այս տվյալների վերաբերյալ։

Խնդիրն այստեղ բոլորովին այլ հարթության մեջ է, երկու դեպքում էլ, ըստ տարածված պաշտոնական հաղորդագրությունների, կարելի է եզրակացնել, որ Վլադիմիր Գասպարյանի նախաձեռնությամբ են տեղի ունեցել այս կասկածահարույց նշանակումները և ընտանիքի անդամներին գումարներ տրամադրելը։ Եվ Հայաստանի գործող իշխանություններն ավելի բարոյական քայլ արած կլինեին, եթե քրեական գործը հարուցեին ոչ թե ընտանիքի անդամների, այլ հենց նախկին ոստիկանապետի դեմ։ Թերևս առաջին անգամն է, որ Հայաստանի գործող իշխանությունները մտնում են մարդու ընտանիք և փորձում նրա կնոջ ու դստեր նկատմամբ ճնշումներ գործադրելու, քրեական գործեր հարուցելու միջոցով ինչ-ինչ քաղաքական կամ իրավական հարցերի լուծում գտնել։

Իհարկե, մարդկային և բարոյական առումով սա չափազանց տգեղ երևույթ է փաշինյանական իշխանության կողմից, սակայն բոլորովին էլ պետք չէ զարմանալ, գործող իշխանությունները բարոյական արգելակներ չունեն, և Վլադիմիր Գասպարյանի դուստրը և կինը կարող էին նույնիսկ չիմանալ, կամ պարտադրված լինել որևէ տեղ գրանցված լինել զբաղեցնել։ Միակ արդարացի և ճիշտ քայլը կլիներ ՝ քրեական գործը բացառապես Վլադիմիր Գասպարյանի նկատմամբ հարուցելը, իսկ այսպես այս քրեական գործերը քաղաքական հաշվեհարդարի տպավորություն են թողնում։