Էրդողանի նոր բացահայտումը. Ինչո՞ւ են ուզում «Զանգեզուրի միջանցքը»

Ռեջեփ Թայիփ էրդողանը երեկ բացահայտել է Թուրքիայի իրական նպատակները «Զանգեզուրի միջանցքի» նկատմամբ։ Թուրքիայի Աղրի շրջանում  Աղրի-Խամուր-Թութակ-Պաթնոս ավտոճանապարհի բացման արարողության ժամանակ Էրդողանը խոսել է այսպես կոչված «մետաքսի ճանապարհի» մասին։

Ըստ էրդողանի՝ «մետաքսի ճանապարհը» Կովկասի երկրներով Թուրքիան կապում է Կենտրոնական Ասիային և Չինաստանին։ «Հաշվի առնելով ներկա պահանջները՝ մենք վճռական ենք՝ վերականգնելու պատմական «Մետաքսի ճանապարհը»: Անմիջապես արևելյան Անատոլիայի Աղրի նահանգի տարածքով կան երթուղիներ, որոնք կապում են Թուրքիան Կովկասի երկրների հետ, այնուհետ՝ դեպի Կենտրոնական Ասիա ու Չինաստան: «Զանգեզուրի միջանցքի» իրականացման շնորհիվ Աղրիի գավառի նշանակությունը կմեծանա»,- հայտնել է էրդողանը։ 

Տևական ժամանակ Թուրքիան Ադրբեջանի հետ համատեղ առաջ է մղում այդ նախագիծը, փորձում Հայաստանից մի հսկա կտոր պոկել՝ սեփական տնտեսական և քաղաքական առաջնահերթություններն առաջ մղելու համար։ Սրան է միտված նաև Հայաստանի հետ հարաբերությունները կարգավորելու «սիրախաղը»։ Ճնշում բանեցնելով ՀՀ ապիկար իշխանությունների վրա՝ Թուրքիայի իշխանությունները մի քանի նպատակներ են հետապնդում, թեև առաջին և գլխավոր նպատակը հենց «մետաքսի ճանապարհն» է, որը թույլ կտա ուղիղ ցամաքային կապ հաստատել թյուրքական երկրների հետ, սերտացնել տնետսական և ռազմական կապերը, իսկ Հայաստանը տասնամյակներ շարունակ սեպ է եղել այդ ճանապարհին։

Այսօր, 44-օրյա պատերազմում Հայաստանի կրած պարտությունից հետո Թուրքիայի համար բարենպաստ իրավիճակ է ստեղծվել, ուստի Էրդողանն ու մյուսներն անթաքույց առաջ են մղում իրենց բուն նպատակները։ 

Թե ինչով է զբաղված ՀՀ իշխանությունը, թերևս չարժե նույնիսկ ասել։

Մինաս Ավագյան