Սանոսյանին պաշտոնի իջեցում է սպասվում
ՎԵՐԼՈՒԾՈՒԹՅՈՒՆՆԵՐ
«Քաղաքացիական պայմանագիր» կուսակցությունն իր համար պարզել է, թե ովքեր են եղել կուսակցության համաժողովում վարչության անդամների ընտրության հիմնական կեղծարարները և կազմակերպիչները և այդ կապակցությամբ մեր աղբյուրի փոխանցմամբ՝ առաջիկայում բավականին հետաքրքիր պատժամիջոցներ են ձեռնարկելու, մասնավորապես ՔՊ-ում անցկացված ներքին հետաքննության, ինչպես նաև իրավապահների փոխանցած որոշ տեղեկությունների համաձայն։
Եթե բոլոր ընտրակեղծիքների թիկունքում կանգնած են պաշտպանության նախարար Սուրեն Պապիկյանը, ապա անմիջական իրականացնողները երկուսն են՝ պատգամավոր Արփի Դավոյանն ու Տարածքային կառավարման և ենթակառուցվածքների նախարար Գնել Սանոսյանը։
Հենց նրանք են եղել ողջ ընթացքում ՔՊ տարածքային կառույցների ստեղծման հիմնական կազմակերպիչները, նրանք են ուղորդել տեղերում իրենց մարդկանց նախ դառնալ ՔՊ տեղական կառույցների խորհրդների անդամներ, ապա և ակտիվորեն մասնակցել ընտրություններին և ցուցակով ընտրություններ իրականացնել։ Այդուհանդերձ նույնիսկ այդ հանգամանքը հնարավոր չի եղել ապահովել որպեսզի հին ՔՊ-ականներից շատերին դուրս թողնել վարչությունից և նրանց փոխարեն ընդգրկեն Սուրեն Պապիկյանի հիմնական կողմնակիցներին։
Թերևս միայն Սանոսյանին է հաջողվել բավականին լուրջ ձայներ հավաքել՝ հույս ունենալով այդ կերպ ոչ միայն պահպանել իր պաշտոնը, այլ նաև ավելի մեծ ազդեցության լծակներ ստանալ ՔՊ-ում։
Նախկինների օրոք բավականին լուրջ կարիերա արած Սանոսյանը, այժմ էլ «կարկառուն» ՔՊ-ական է դարձել և կատարում է բացառապես Սուրեն Պապիկյանի հրահանգները։ Մեր աղբյուրի փոխանցմամբ՝ ՔՊ-ում բավականին կոշտ են տրամադրված Սանոսյանի հանդեպ, վերջինիս մեղադրում են ոչ միայն վարչության ընտրությունների կեղծման, այլ նաև տարբեր կուսակիցների դեմ Նիկոլ Փաշինյանի մոտ դավեր նյութելու մեջ, ուստի և կարողացել են հասնել նրան, որպեսզի Փաշինյանը լրջորեն մտածի Սանոսյանին պատելու մասին։
Այդուհանդերձ Սանոսյանին ընդհանրապես ոչ թե հեռացնելու են պետական կառավարման համակարգից, այլ ավելի ցածր պաշտոնի են տանելու՝ կառավարությանն առընթեր որևէ կոմիտեի նախագահ։
«Քաղպայմանագրում» կարծում են, որ սա բավականին լուրջ աքսոր է նախարարի պաշտոնի համեմատ, և դրանից հետո Սանոսյանը ստիպված կլինի գլուխը կախ աշխատել։
Իհարկե կա նաև այլ տարբերակ. ընդհանրապես Սանոսյանին հեռացնել կուսակցությունից և որևէ պաշտոնի չնշանակել։ Այդ դեպքում, սակայն, «Քաղպայմանագրում» մտավախություն ունեն, որ Սանոսյանը կարող է արագ վերապռոֆիլավորվել ընդդիմադրի և տարբեր տեղեկատվական արտահոսքեր կազմակերպել Փաշինյանի և նրա կուսակիցների դեմ։
Աննա Նադոյան
