«Մացո»-ի նշանակումը կարող է լուրջ ցնցումներ առաջացնել իշխանական բուրգում
ՎԵՐԼՈՒԾՈՒԹՅՈՒՆՆԵՐ
Տխրահռչակ դատավոր Մնացական Մարտիրոսյանին հակակոռուպցիոն դատարանի պաշտոնում առաջադրելու ԲԴԽ-ի որոշումը շարունակում է ցնցել իշխանական համակարգը։ Նույնիսկ Նիկոլ Փաշինյանի ամենահավատարիմ զինակիցներից շատերը չեն կարողանում մարսել նման քայլը և ամեն ինչ անում են այդ իրենց դժգոհությունը հայտնելու համար։
Նշենք, որ ԲԴԽ-ում կայացած փակ, գաղտնի քվեարկության ժամանակ Մնացական Մարտիրոսյանը ստացել է 6 կողմ և 3 դեմ ձայներ, ընդ որում, դեմ են քվեարկել ԲԴԽ նախագահ Կարեն Անդրեասյանը, անդամներ ՝Վիգեն Քոչարյանը և Երանուհի Թումանյանցը։ ԲԴԽ անդամ Դավիթ Խաչատուրյանն, օրինակ, կողմ է քվեարկել Մնացական Մարտիրոսյանին, Դավիթ Խաչատուրյանը ժամանակին Սորոսի գրասենյակի համակարգողն էր, իսկ նրա եղբայրը զբաղեցնում է հակակոռուպցիոն կոմիտեի նախագահի պաշտոնը։ Փաստացի Նիկոլ Փաշինյանը մտադիր է Մնացական Մարտիրոսյանին գործուղել հակակոռուպցիոն դատարան` հիմա էլ անտրտունջ իր քաղաքական պատվերները դակելու համար։
Մարտիրոսյանը, որ քաղաքական բնույթի խայտառակ վճիռներ կայացնելու լուրջ փորձ ունի, այդ թվում տևական ազատազրկումների է դատապարտել Ժիրայր Սեֆիլյանին, Նիկոլ Փաշինյանին և այլ անձանց, գրեթե երբեք չի հակառակում գործող իշխանություններին։ Հենց Մնացական Մարտիրոսյանի վարույթում են գտնվում հասարակական-քաղաքական գործիչ «Արար» հիմնադրամի համահիմնադիր Ավետիք Չալաբյանի դատաքննությունը, քաղաքաշինության կոմիտեի նախկին նախագահ Վահագն Վերմիշյանը նրա դատական նիստի ժամանակ էր առողջական լուրջ խնդիրներ ունեցել, իսկ Արմեն Գրիգորյանն էլ սրտամկանի կաթված էր տարել դատական նիստի ժամանակ և մահացել։
Մնացական Մարտիրոսյանին այս փաստերը գրեթե չեն հուզում, նրա համար կա թիվ մեկ խնդիր՝ ամեն գնով ծառայել օրվա իշխանություններին։ Ի դեպ Մարտիրոսյանին դեռևս չեն նշանակել դատավորի պաշտոնում, նշանակումը ԲԴԽ առաջարկով պետք է իրականացնի հանրապետության նախագահ Վահագն Խաչատուրյանը։ Առայժմ հայտնի չէ, թե արդյոք Խաչատուրյանը կնշանակի Մնացական Մարտիրոսյանին, թե ոչ։ «Հայ ազգային կոնգրեսի» նախկին անդամ Խաչատուրյանի բազմաթիվ ընկերների նույն Մարտիրոսյանը դատապարտել է տևական ազատազրկումների և այժմ չափազանց սյուռ կլինի տեսնել, թե ինչպես է հանրապետության նախագահի պաշտոնը զբաղեցնող անձը ամենատխրահռչակ դատավորին նշանակում հակակոռուպցիոն դատարանի դատավոր։
Ի դեպ, տխրահռչակ բառը մենք բոլորովին էլ անհիմն չենք նշում, այդ բառը ժամանակին օգտագործել է հենց ինքը՝ Նիկոլ Փաշինյանը, գնահատելով Մնացական Մարտիրոսյանի գործունեությունը, և այժմ էլ ինքն էլ համալրելով տխրահռչակների ցանկը՝ օգտվում է այս տխրահռչակ դատավորի ծառայություններից հերթական խայտառակ քաղաքական պատվերները իջեցնելու և իրականացնելու համար։
Զարինե Կիրակոսյան
