ՔՊ-ականների տնտեսական բլոկում «պատերազմ» է. ի՞նչ չեն կիսել Թունյանն ու Քերոբյանը

ՎԵՐԼՈՒԾՈՒԹՅՈՒՆՆԵՐ 21 Նոյեմբեր, 2022 21:38

ՀՀ վիճակագրական կոմիտեի տվյալներով` 2020 թվականի համախառն ներքին արդյունքի մոտավորապես 60%-ը բաժին է ընկել Երևանին։ Այս մասին Ֆեյսբուքի իր էջում գրել է ԱԺ տնտեսական հարցերի հանձնաժողովի նախագահի տեղակալ Բաբկեն Թունյանը:«Ընդ որում, 3 տարվա դինամիկան ցույց է տալիս, որ մայրաքաղաքի կշիռը տնտեսության մեջ աճել է. 2018 թվականին 54.1% էր, 2019 թվականին՝ 58.4%։ Սա նշանակում է, որ տարածքային համաչափ զարգացման խնդիրը, որը ձևակերպված է նաև Կառավարության 2021-2026 թթ. ծրագրում, առավել քան արդիական է»,- գրել է պատգամավորը:

Ինչ խոսք, Թունյանը այս դեպքում ճիշտ է, սակայն հարց է առաջանում՝ իսկ ո՞ւմ է ուղղված այս կսմիթը և ով է տապալել տարածքային համաչափ զարգացման խնդրի լուծումը: Արդյո՞ք ոչ էկոնոմիկայի նախարարությունը՝ ի դեմս Վահան Քերոբյանի, և հենց նրա ինչպես ասում են՝ բոստանն էլ ուղղված է այս քարը: Ընդհանրապես, պետք է նշել, որ երկու ՔՊ-ականների միջև պայքարը բավական երկար է ձգվում: Թեև միանգամից նշենք, որ այս դեպքում խոսքը ոչ այնքան միջանձնային կոնֆլիկտի կամ հակամարտության մասին է, այլ նրա, որ Բաբկեն Թունյանը մի քանի անգամ հրապարակային կերպով ուղղակիորեն կամ անուղղակիորեն կասկածի տակ է դրել Քերոբյանի այս կամ այն հայտարարությունները և պնդումները:

Օրինակ, գրառումներից մեկում Քերոբյանը նշել էր, որ Հայաստանը վերածվել է մեծ շինհրապարակի: Թունյանը իր հերթին հարցազրույցներից մեկում կասկածի տակ էր առել նախարարի այս պնդումը: ««Վերածվել է շինհրապարակի»՝ այդ ձեւակերպման մեջ ես չեմ ուզում խորանալ, բայց ակնհայտորեն անցած տարվա համեմատ մենք ունենք տնտեսական ցուցանիշների բարելավում»-ասել էր Թունյանը: Ինչ վերաբերում է ներդրումների հոսքին՝ Թունյանն ասել էր, որ ներդրումների վիճակագրություն չի հրապարակվել ու չի կարող ասել, թե ինչպես են տվյալները փոխվել: Մինչդեռ Քերոբյանը հայտարարում էր, որ ներդրումները հորդում են:

Թունյանն ու Քերոբյանը հակադիր կարծիքներ ունեին նաև տխրահռչակ կլինկերի հարցում: ԱԺ-ում Թունյանը հայտարարել էր հետևյալը՝ դիմելով նախարարին: «Դուք հաշվարկ եք արել և ասում եք, որ կլինկերից ցեմենտ ստանալու արտադրական ծախսը կազմում է 1 տ համար 2500 դրամ: Կլինկերից ցեմենտ ստացող ընկերությունը մեզ տրամադրել է թվեր, ըստ որոնց կլինկերից ցեմենտ ստանալու համար ծախսվում է 7000 դրամ: Կա՛մ Ձեր հաշվարկն է սխալ, կա՛մ իրենք խաբում են»: Այսպիսով, Թունյանը հերթական անգամ կասկածի տակ էր առնում Քերոբյանի հաշվարկները և առաջ քաշած թեզերը:

Ըստ էության, ՔՊ-ի ներսում ամեն բան այնքան էլ հարթ չէ ընթանում և չի բացառվում, որ Թունյանը, ով, կարծես թե, տնտեսության մեջ ավելին է հասկանում, քան Քերոբյանը, փորձում է վերջինիս այսպես ասած՝ բռնել սխալների վրա և, ինչու ոչ, գուցե ապագայում զբաղեցնել էկոնոմիկայի նախարարի պաշտոնը: Նշենք, որ Քերոբյանն էլ իր հերթին ասուլիսների ժամանակ հիմնականում պաշտպանվում է և փորձում հանրությանը ներկայացնել իր ճոխ ձեռքբերումները, ճիշտ է՝ առանց թվեր նշելու: