Փաշինյանը վերադասավորումներ է պատրաստում կառավարությունում
ՎԵՐԼՈՒԾՈՒԹՅՈՒՆՆԵՐ
«Քաղաքացիական պայմանագիր» կուսակցությունում վարչության ընտրությունների և դրանց կեղծման փաստի հետևանքները զգացվելու են արդեն Ամանորից հետո։
Մեր տեղեկություններով՝ Նիկոլ Փաշինյանը մտադիր է լուրջ վերադասավորումներ իրականացնել Հայաստանի կառավարությունում։ Մի ամբողջ շարք նախարարներ և բարձրաստիճան պաշտոնյաներ հրաժեշտ են տալու իրենց պաշտոններին։ Մասնավորապես, ՔՊ մեր աղբյուրի փոխանցմամբ՝ առաջինը հեռացվելու է փոխվարչապետ Համբարձում Մաթևոսյանը։ Փաշինյանն այս պահին դեռևս չունի որևէ թեկնածու, որով կկարողանա փոխարինել Մաթևոսյանին։
Խոսում են, որ այդ պաշտոնին կարող է նշանակվել ընդհուպ «Լուսավոր Հայաստան» կուսակցության նախագահ Էդմոն Մարուքյանը։ Մարուքյանի անունը շրջանառվում է նաև արտգործնախարարի պաշտոնի համար։ Փաշինյանը այնքան էլ դժգոհ չէ Արարատ Միրզոյանից, սակայն ստեղծված իրավիճակում ստիպված է լինելու կատարել Ռուսաստանի պահանջը և ազատվել Միրզոյանից։
Առայժմ Փաշինյանը չի կարողացել անհրաժեշտ թեկնածու գտնել արդարադատության նախարարի համար։ Միքայել Մինասյանի եղբայրը՝ Գրիգոր Մինասյանը, չի արդարացրել Փաշինյանի հույսերը, իսկ այլ թեկանածու նա չունի։ Խոսում են, որ արդարադատության նախարար կարող են նշանակել գլխավոր դատախազի տեղակալներից որևէ մեկին, այն էլ միայն գլխավոր դատախազի միջնորդությամբ։ Իրենց պաշտոններին հրաժեշտ կտան Բարձր տեխնոլոգիական արդյունաբերության նախարար Ռոբերտ Խաչատրյանը, Էկոնոմիկայի նախարար վահան Քերոբյանը, Կրթության, գիտության, մշակույթի և սպորտի նախարար Վահրամ Դումանյանը, Շրջակա միջավայրի նախարար Հակոբ Սիմիդյանը։
Շրջակա միջավայրի նախարար կնշանակվի, ամենայն հավանականությամբ, ՏԿԷ գործող նախարար Գնել Սանոսյանը։ Էկոնոմիկայի նախարարի պաշտոնի համար քննարկվում է Ազգային ժողովից Բաբկեն Թունյանի թեկնածությունը, թեև ԱԺ տնտեսական հարցերի հանձնաժողովի նախարարի պաշտոնի համար փաշինյանական խմբակցությունը մարդ պարզապես չունի։
Փաշինյանը առայժմ նաև չի կողմնորոշվել ներքին գործերի նորաստեղծ նախարարության ղեկավարի պաշտոնի համար, այդ պաշտոնում շրջանառվում են ՊՎԾ պետ Ռոմանոս Պետրոսյանի կամ ԱԻՆ նախարար Արմեն Փամբուխչյանի անունը։
Նրանցից որին էլ նշանակեն ՆԳ նախարար, մյուսին մտադիր են նշանակել Տարածքային կառավարման նախարարի պաշտոնում։ Պետական վերահսկողական ծառայության ղեկավարի պաշտոնում Փաշինյանը դիտարկում է Արսեն Թորոսյանի թեկնածությունը, սակայն ՔՊ-ում գրեթե բոլորը դեմ են այդ նշանակմանը։ Թորոսյանին մեղադրում են վարչության ընտրությունների կեղծման մասին տեղեկությունները դուրս հանելու և մամուլի սեփականությունը դարձնելու մեջ։
Աննա Նադոյան
