Փաշինյանն ինքն է արձանագրում «Խաղաղության դարաշրջանի» վախճանը

Հայաստանի գործող իշխանություններն արդեն իրենք են ամենօրյա ռեժիմով թվիթթերում և այլ սոցցանցերում արձանագրումներ անում «Խաղաղության դարաշրջանի» վախճանի վերաբերյալ։

Եվ այժմ էլ փորձում են համոզել, թե ինչու տեղի չի կնքվում «Խաղաղության դարաշրջանի» պայմանագիրը և ով է դրա մեղավորը։ Երեկ առավոտյան էլ վարչապետի պաշտոնը զբաղեցնող Նիկոլ Փաշինյանն է գրառում արել, որում նշել է, թե՝ Ադրբեջանը հայտարարում է, որ Լեռնային Ղարաբաղի հայերը իր քաղաքացիներն են, սակայն կրակում է նրանց վրա գյուղատնտեսական աշխատանքների ժամանակ։

«2020 թվականի նոյեմբերի 9-ից հետո Ադրբեջանը խաղաղ բնակիչների սպանելու 54 փորձ է ձեռնարկել, որի հետևանքով 3 խաղաղ բնակիչ սպանվել է, 16-ը՝ վիրավորվել։ «Սա է Ադրբեջանի՝ Լեռնային Ղարաբաղի հիմնախնդիրը և լուծված է նարատիվի իրականացումը»,- թվիթթերում գրել է վարչապետը։

Փաշինյանը այս արձանագրումն արել է նախօրեին Արցախի Խրամորթ բնակավայրում տեղի ունեցած կրակոցների վերաբերյալ։ Գաղտնիք չէ, որ 44- օրյա պատերազմից հետո Ադրբեջանը պարբերական ռեժիմով իրականացնում է հրադադարի նման խախտումներ և միայն այժմ իշխանության վերին օղակները՝ այդ թվում հատուկ հանձնարարությունով դեսպան Էդմոն Մարուքյանն ու այլ անձինք, փորձում են հանրությանը համոզել «Խաղաղության դարաշրջանի» օրակարգի անհեռանկարայնության մեջ, մինչդեռ ԻՆՔԸ՝ Նիկոլ Փաշինյանը, 2 տարի շարունակ մատը մատին չի խփել երկրի պաշտպանողակությունը վերականգնելու ուղղությամբ՝ անընդհատ «Խաղաղության դարաշրջանի» իր թեզերն առաջ մղելով։

Հարկ է արձանագրել, որ Հայաստանը գտնվում է վտանգավոր մի հանգրվանում, որտեղից տեսնելի չէ, թե ինչ հետևանքներ են սպասվում մեր երկրին, իսկ իշխանությունը նախաձեռնողականությունը թողել է Ադրբեջանի ձեռքում։ Անվտանգության հարցերով փորձագետ, Ազգային ժողովի պատգամավոր Տիգրան Աբրահամյանն է արձանագրել, թե վերջին շրջանում Ասկերանի շրջանի մի քանի բնակավայրերի ուղղությամբ ադրբեջանական կողմը տարբեր բնույթի սադրանքների է գնացել, որոնք ուղեկցվում են սպառնալիքներով։

«Այդ սադրանքներն ունեն հստակ համակարգված բնույթ, կա հստակ ձեռագիր, կա պլանավորում և ադրբեջանցիներն այդ գծի մեջ են գործում։ Հետպատերազմյան ժամանակաշրջանի պայմանավորվածություններն ու ռազմաքաղաքական դասավորությունը հանգեցրել են նրան, որ նմանատիպ միջադեպեր անընդհատ լինելու են, և արցախցիները ստիպված են անընդհատ այդպիսի ռեժիմում ապրել ու աշխատել, մյուս կողմից հեշտ է կողքից այդ իրավիճակում ապրողներին անընդհատ հիշեցնել, որ իրավիճակն այսպես է դասավորվել, պետք է դիմանալ, կամ հարմարվել»,- փաստել է պատգամավորը։

Անի Մսրյան