Վարչախումբը հոգնել է Վահան Քերոբյանից․ փոխարինող են գտել

Իշխանական օլիգարխ Խաչատուր Սուքիասյանի հարձակումը էկոնոմիկայի նախարար Վահան Քերոբյանի վրա Ազգային ժողովում, թերևս անհետևանք չի մնալու։ Քերոբյանը արդեն տևական ժամանակ դարձել է գործող իշխանությունների տարբեր ներկայացուցիչների համակարգված հարձակումների թիրախը։

Երեկ էլ քաղաքապետարանում գործակարգավորական նիստի ժամանակ Քերոբյանի հասցեին ծաղրական է արտահայտվել գործող քաղաքապետ Հրաչյա Սարգսյանը։ Այս փաստն էլ մեկ անգամ ևս վկայում է, որ փաշինյանական վարչախումբը որոշում է կայացրել ձախողված նախարար Քերոբյանից ազատվելու վերաբերյալ և այժմ էլ, ընդամենը, իր տարբեր ներկայացուցիչների հանձնարարել է ապահովել նրա հեռացման համապատասխան քարոզչական ֆոնը։

Այն, որ Վահան Քերոբանը վաղուց հայտնի է դարձել անհեթեթ արտահայտություններ անելու իր կարողությամբ, որևէ մեկի համար գաղտնիք չէ։ Քերոբյանը առաջին լուրջ վարկանիշային կորուստն ունեցավ, երբ հայտարարեց, թե Հայաստանը երկնիշ տնտեսական աճ է ունենալու, հակառակ դեպքում ինքը հրաժարական կտա, իսկ հետո էլ փորձում էր համոզել, թե Նիկոլ Փաշինյանն է իրեն արգելել հրաժարական տալ։

Այս անսկզբունքայնությունից հետո նա բազմաթիվ անգամներ աչքի է ընկել տարբեր անհեթեթ հայտարարություններով, վերջերս էլ նշել էր, թե սփյուռքահայերի 70 տոկոսը ցանկանում է ներդրումներ անել Հայաստանում։ Հաշվի առնելով, որ Հայկական Սփյուռքը ամենանվազագույնը 7 միլիոն է, կարելի նախարարի խոսքերից եզրակացնել, թե նրանց 5 և ավելի միլիոնը ցանկանում է ներդրումներ անել Հայաստանում։ Մինչդեռ Հայաստանում որևէ նման նախադրյալ գոյություն չունի, նույնիսկ 5 կամ 50 հազար սփյուռքահայերի վերաբերյալ։

Ըստ էության, իշխանություններն իրենք էլ հոգնել են Քերոբյանի վարքից և հռետորաբանությունից և ցանկանում են ազատվել նրանից։ Նշում են, թե այս հարցում Փաշինյանը նաև նոր նախարարի թեկնածու ունի։ Շրջանառվում է Ազգային ժողովի տնտեսական հարցերի հանձնաժողովի նախագահ Բաբկեն Թունյանի անունը։

Սերինե Բադալյան