Փաշինյանը կրկին փորձում է ստանալ ռուսների բարեհաճությունը

Ղարաբաղյան կարգավորման գործընթացում արևմտյան երկրների ակտիվացման ֆոնին, երեկ Հայաստան է ժամանել ԵԱՀԿ Մինսկի խմբի ռուսաստանցի համանախագահ, հայ-ադրբեջանական հարաբերությունների կարգավորման աջակցելու հարցերով ՌԴ ԱԳ նախարարի հատուկ ներկայացուցիչ` Իգոր Խովաևը։

Խովաևը հանդիպել է արտգործնախարար Արարատ Միրզոյանին և վարչապետ Նիկոլ Փաշինյանին։ Միրզոյանի հետ հանդիպմանը քննարկել են Հայաստանի և Ադրբեջանի միջև հարաբերությունների կարգավորմանը, Լեռնային Ղարաբաղի հիմնահարցի հանգուցալուծման առնչվող վերջին զարգացումները, անդրադարձել Սոչիում կայացած եռակողմ հանդիպմանը ու ընդունված համատեղ հայտարությանը։

Մտքեր են փոխանակել նաև Հայաստանի և Ադրբեջանի միջև սահմանազատման գործընթացի նաև տարածաշրջանի տրանսպորտային ենթակառուցվածքների, ապա շրջափակման վերաբերյալ։ Առավել ուշագրավ է Հայաստանի վարչապետի աշխատակազմի տարածած հաղորդագրությունը, ըստ որի Փաշինյանն իբր Խովաևին ասել է, թե Հայաստանը պաշտպանում է ռուսական կողմի դեռևս ընթացիկ տարվա օգոստոսին ներկայացված առաջարկները, որոնք կարող են Հայաստանի և Ադրբեջանի միջև հարաբերությունների կարգավորման հետագա բանակցությունների հիմք հանդիսանալ։

Փաշինյանը թերևս ինքն էլ հասկանում է իր չափազանց ոչ շահեկան վիճակը և փորձում արժանանալ Ռուսաստանի իշխանությունների բարեհաճությանը։ Հատկապես արտաքին քաղաքական վեկտորի փոփոխության խոսակցությունների ֆոնին՝ գործող իշխանությունները լրջորեն կորցրել են իրենց ունեցած ազդեցությունն ու կապերը Ռուսաստանում, իսկ ռուսական առաջատար դեմքերի՝ Կոնստանտին Զատուլինի, Մարգարիտա Սիմոնյանի, Անդրանիկ Միհրանյանի մուտքը Հայաստան արգելելով՝ ընդհանրապես քարոզչական ճակատում բավականին լուրջ խնդիրների են բախվում։

Թերևս գործող իշխանություններին թվում էր, թե նման քայլերով կկարողանան դառնալ Արևմուտքի աչքի լույսը, սակայն վերջին շրջանում արևմտյան երկրներն առանձնապես ջանքեր չեն գործադրում Փաշինյանին փոսից դուրս բերելու համար, և այժմ նա պատեպատ է զարկվում, փորձում կրկին արժանանալ ռուսական իշխանությունների համակրանքին։

Աննա Նադոյան