Թուրքիան կրկին նախապայմաններ է քաշում Հայաստանի դեմ
ՎԵՐԼՈՒԾՈՒԹՅՈՒՆՆԵՐ
Հայ-թուրքական հարաբերությունների կարգավորման գործընթացի սկզբից ի վեր թե՛ հայկական, թե՛ թուրքական կողմերը բազմիցս հայտարարել են, թե հարաբերությունները կարգավորելու են առանց նախապայմանների։
Մինչդեռ գործնականում, եթե Հայաստանի գործող իշխանությունները Փաշինյանի գլխավորությամբ վերածվել են թուրք-ադրբեջական տանդեմի խամաճիկի և ընդհանրապես ծպտուն չեն հանում որևէ հարցում, այդ թվում մի կողմ թողնելով, թե 44-օրյա պատերազմում Թուրքիայի դերը և թե ցեղասպանության միջազգային ճանաչումը, ապա թուրքական իշխանություններն առիթը բաց չեն թողնում անընդհատ Հայաստանին նոր նախապայմաններ առաջադրելու համար։
Թուրքիայի նախագահ Ռեջեփ Թայիբ Էրդողանը Անկարայի Էսենբողա օդանավակայանում Սամարղանդ թռիչքից առաջ պատասխանել է լրագրողների հարցերին և հայտարարել, թե Թուրքիայի և Հայաստանի հարաբերությունները դրական կլինեն, եթե Երևանի և Բաքվի հարաբերությունները կարգավորվեն, մինդեռ Հայաստանի կողմից դրական պատկեր չկա։
Տակավին օրեր առաջ Թուրքիայի արտգործնախարար Մեվլութ Չավուշողլուն դրական միտումներ էր նկատել հայ-թուրքական կարգավորման մեջ, իսկ երեկ արդեն Էրդողանը հերքում է իր իսկ արտգործնախարարին։
Թուրքիայի նախագահն հայտարարել է , թե Անկարան ցանկանում է ընդլայնել բարեկամների, այլ ոչ թե թշնամիների շրջանակը։ Բաքվի նկատմամբ Երևանի ձեռնարկվող քայլերը դրական ազդեցություն կունենան նաև մեր գործողությունների վրա,- ասել է Էրդողանը և հավելել, թե Փաշինյանի հետ հանդիպմանը նրան պարզ ու հստակ ներկայացրել է Անկարայի դիրքորոշումը, որ Հայաստանի հետ երկխոսությունները Թուրքիայի և Ադրբեջանի հետ փոխկապակցված են։
«Մենք Երևանից գործուն քայլեր ենք ակնկալում։ Այժմ մտել ենք հարաբերությունների կարգավորման որևէ մակարդակի, միայն Հայաստանն է իվիճակի փոխելու իրադրությունը դրական ուղղությամբ՝ նվազագույնի հասցնելով Սփյուռքի գործողությունների բացասական էֆեկտը։
Իհարկե հայ-թուրքական հարաբերությունների կարգավորման կոնտեստում, Թուրքական իշխանությունները բազմիցս քննադատական խոսքեր են հնչեցրել հայկական Սփյուռքի հասցեին, Էրդողանն էլ նշել է, թե հայկական Սփյուռքը լինի դա Ֆրանսիայում, թե Միացյալ Նահանգներում, դեմ է երկխոսությանը, ինչը բացասական ազդեցություն է թողնում ողջ գործընթացի վրա և հայկական Սփյուռքի դերը չեզոքացնելու գործն էլ թուրքական իշխանությունները թողնում են Նիկոլ Փաշինյանի վտիտ ուսերին։
Աննա Նադոյան
