Ինչպե՞ս կազդի ԱՄՆ ընտրությունները գլոբալ զարգացումների վրա

ԱՄՆ Կոնգրեսի միջանկյալ ընտրություննները սպառնում են լրջագույն հետևանքներ ունենալ ողջ աշխարհի քաղաքական պատկերի վրա, ազդել, այդ թվում նաև հետխորհրդային տարածքի քաղաքական զարգացումների վրա՝ ի մասնավորի Հարավային Կովկասում ԱՄՆ քաղաքականությունը լրջագույն փոփոխություններ կարող է կրել։

Այս պահի դրությամբ ձայների հաշվարկը դեռևս շարունակվում է, սակայն վստահաբար կարելի է պնդել, որ Ներկայացուցիչների տունը անցել է «Հանրապետական» կուսակցության վերահսկողության ներքո, իսկ Սենատի ճակատագիրը որոշվելու է միայն դեկտեմբերի 6-ին՝ Ջորջիա նահանգում։ Հանրապետական և Դեմոկրատ մրցակիցների միջև տարբերությունն այնքան փոքր է եղել, որ որոշում է կայացվել նոր ընտրություններ գումարել դեկտեմբերի 6-ին։

Այդ ժամանակ էլ հայտնի կդառնա՝ արդյո՞ք Սենատն ամբողջությամբ անցնում է հանրապետականների վերահսկողության տակ, թե մնում է դեմոկրատներին։ Այս պահին հանրապետականները Սենատում ունեն 50, դեմոկրատները՝ 49 մանդատ, գումարած փոխնախագահի քվեն, և ընդամենը մեկ քվե է պակասում յուրաքանչյուր կուսակցությանը ՝ Սենատում մեծամասնություն կազմելու համար։

Դեռևս մինչև ընտրությունները, վերլուծաբանները նշում էին, որ Միացյալ Նահանգներում հանրապետականների հաղթանակի դեպքում, նախ փոփոխություններ են կատարվելու Ուկրաինայի նկատմամբ ԱՄՆ քաղաքականության մեջ։ Ներկայացուցիչների տանը՝ դեմոկրատական խմբակցության ղեկավար Կեյվին Մակկարտին հայտնել էր, թե իրենք այլևս հաղթանակի դեպքում գումարներ դուրս չեն գրի Ուկրաինային, իսկ տրված զենքի և փողի համար լրջագույն վերահսկողություն են իրականացնելու։

Հանրապետականները նաև նշել են, թե իրենք ավելի շատ կենտրոնանալու են Միացյալ Նահանգների ներքին խնդիրների, գնաճի և աբորտների հարցին, քան զբաղվելու են աշխարհաքաղաքական գործընթացներով։ Ինչ-որ առումով սա որոշակի դրական ազդակ կարող է լինել նաև Ռուսաստանի համար, իզուր չէ, որ դեմոկրատները շաբաթներ շարունակ Ռուսաստանին մեղադրում էին ԱՄՆ ընտրություններին միջամտելու փորձերի՝ հօգուտ հանրապետականների իրավիճակը բեկելու։

Միակ դրականն այստեղ այն էր, որ Պենսիլվանիա նահանգում հայկական և հրեական համայնքներին հաջողվեց կանխել ազգությամբ թուրք, հանրապետական Մեհմեդ Օզի ընտրությունը։

Թուրքիայի քաղաքացիություն ունեցող Օզը հայտնի է որպես Ռեջեփ Թայիփ Էրդողանի լավ ընկեր և բազմաթիվ անգամներ հանդես է եկել Հայոց ցեղասպանությունը ժխտելու հայտարարություններով։

Նանե Ղազարյան