Արդարադատության համակարգի այլասերումը շարունակվում է

Հայաստանի քաղաքական դաշտը վերջնականապես այլասերելուց հետո Նիկոլ Փաշինյանի և նրա խմբակի ձեռքերը վերջապես հասան արդարադատության համակարգ։ Գլխավոր դատախազի պաշտոնում նշանակված Փաշինյանի օգնական Աննա Վարդապետյանը սկսել է իր քմահաճույքով վերաձևել դատախազության բավականին կուռ համակարգը, հեռացնել բոլոր անհնազանդներին, փոխարենը այնտեղ նշանակել իր մերձավորներին։

Նախօրեին էլ գլխավոր դատախազի տեղակալ է նշանակվել իրավաբան Անահիտ Մանասյանը։ Դատախազությունը հատուկ հաղորդագրություն է տարածել, իբր Անահիտ Մանասյանն ընտրվել է որակավորման հանձնաժողովի մրցույթում՝ միաձայն դրական եզրակացությամբ։ Նա եղել է Սահմանադրական դատարանի խորհրդական, զբաղեցրել է Արդարադատության ակադեմիայի պրոռեկտորի պաշտոնը, այս տարվա ապրիլից օգոստոս էլ եղել է Եվրամիության աջակցությամբ իրականացվող Հայաստանում «Արդարադատության համակարգի ամրապնդում» ծրագրի ավագ իրավական փորձագետ։ Մանասյանի միակ արժանիքը, որով նա նշանակվել է այդ պաշտոնին, Աննա Վարդապետյանի ընկերուհին լինելն է։

Մեր տեղեկություններով՝ Փաշինյանը բավականին լուրջ հանձնարարություններ է տվել գլխավոր դատախազին, նրան օժտել բավարար հնարավորություններով և լիազորություններով, դատախազական համակարգը Արթուր Դավթյանից հետո վերջնականապես վերացնելու և գործող իշխանությունների խամաճիկ դարձնելու համար։

Արդարադատության համակարգի մեկ այլ ուղղությունն էլ ՝ դատականն է։ ԲԴԽ նախագահի պաշտոնում նշանակված Կարեն Անդրեասյանն էլ վաղուց սկսել է անհնազանդ դատավորներին հեռացնելու գործընթացը։ Այս օրերին Արդարադատության նախարարի պաշտոնը ժամանակավորապես կատարող Գրիգոր Մինասյանը բազմաթիվ վարույթներ է ներկայացնում ԲԴԽ-ին, իսկ Կարեն Անդրեասյանը, ով այժմ թվային գերակշռություն ունի դատավորների նկատմամբ, փորձելու է հեռացնել բոլոր այն դատավորներին, ովքեր տարիներ շարունակ չեն ենթարկվել Փաշինյանի դավաճանական վարչախմբին։

Մինչ օրս նախարար չունի Արդարադատության նախարարությունը։ Գրիգոր Մինասյանը միայն պաշտոնակատար է, Փաշինյանն էլ չի շտապում ո՛չ նրան, ո՛չ էլ մեկ ուրիշին նշանակելու այդ պաշտոնում, ավելին Մինասյանին հստակ հասկացրել են, որ նա կկարողանա դառնալ նախարար միայն այն դեպքում, եթե արդարացնի Նիկոլ Փաշինյանի բոլոր հույսերը, համապատասխանաբար աշխատի նոր գլխավոր դատախազի և ԲԴԽ նախագահի հետ և իրականացնի Արդարադատության համակարգի վերջնական նվաստացումը։

Աննա Նադոյան