«Եռակողմ բանակցությունները Սոչիում. ի՞նչն է կադրից դուրս մնացել»
ՎԵՐԼՈՒԾՈՒԹՅՈՒՆՆԵՐ
Smotrim.ru–ն գրում է, որ հոկտեմբերի 31-ին Սոչիում կայացել են Պուտինի, Ալիևի և Փաշինյանի բանակցությունները։ Առավել կարևոր է այն, որ իրականում մինչ այդ ղեկավարները 2 ժամից ավելի միասին զրուցել են և ընթացքում իրենց նախարարների օգնությամբ ճշտել ամփոփիչ հայտարարության տեքստը։
Այսպիսի պատկեր բազմիցս է կրկ ել. Լավրովը փաստաթղթերով խոսում է հայկական պատվիրակության հետ, հետո ադրբեջանական: Հենց այդպես են կայացվում կարևոր որոշումները։ Ադրբեջանական պատվիրակությունն ուսումնասիրում է համատեղ հայտարարության տեքստի նախագիծը։ Ամեն բառն է կարդում, ամեն ստորակետին նայում, ինչ որ բան, ըստ երևույթին, չի համապատասխանում, ադրբեջանցի նախարարը թերթը ցույց է տալիս Լավրովին և անհամաձայնության ժեստ անում։
Նույն թղթով Լավրովը գնում է Հայաստանի արտաքին գործերի նախարարի մոտ։ Նորից մանրակրկիտ ուսումնասիրություն, ապա Ռուսաստանի և Հայաստանի արտգործնախարարները լքում են դահլիճը դեմ առ դեմ զրուցելու համար, նրանք նստում են փակ դռների հետևում, ՌԴ ԱԳՆ ղեկավարը տեքստում ինչ որ բան է ցույց տալիս, հայ գործընկերն էլ իր հերթին մի բանի վրա է ուշադրություն հրավիրում: Դրանից հետո անմիջապես Լավրովը գնում է Ադրբեջանի արտաքին գործերի նախարարի մոտ, իսկ հայ նախարարն անմիջապես զեկուցում է իր անմիջական ղեկավարին՝ վարչապետ Փաշինյանին, և նրա հետ զրույցից հետո փաստաթղթերով կրկին գնում է ռուս գործընկերոջ մոտ։
Բանակցությունները անդադար շարունակվում են, Սոչիում եղանակն ավելի ու ավելի է վատանում, տեղատարափը թակում է տանիքը, բանակցություններն ակնհայտորեն ձգձգվում են, դահլիճ են բերում խմելու ջուր, քրտնաջան աշխատանքից և երկար սպասելուց հետո դա միանգամից բոլորին է պետք։ Ապա դահլիճ են մտնում Ռուսաստանի, Ադրբեջանի և Հայաստանի ղեկավարները։ Նախագահ Պուտինը հրապարակավ ամփոփում է արդյունքները:
«Ամեն ինչ չէ, որ համաձայնեցվել է,- ասում է Ռուսաստանի ղեկավարը,- որոշ բաներ պետք էր հանել մասնագետների մակարդակով նախկինում մշակված տեքստից, այնուամենայնիվ, ես համաձայն եմ ընդհանուր գնահատականի հետ, որ հանդիպումը օգտակար էր, և դա պայմաններ է ստեղծել իրավիճակի կարգավորմանն ուղղված հետագա քայլերի համար, Ռուսաստանն իր հերթին կանի ամեն ինչ վերջնական և համապարփակ կարգավորման հասնելու և այս երկարատև հակամարտությանը վերջ դնելու համար»։
Նյութը հրապարակման պատրաստեց Կամո Խաչիկյանը
