Խաչատուր Սուքիասյանին որոշել են պատժել. «ուտող-ուրացողի» ֆենոմենը
ՎԵՐԼՈՒԾՈՒԹՅՈՒՆՆԵՐ
«Քաղաքացիական պայմանագրի» պատգամավոր, գործարար Խաչատուր Սուքիասյանի դեմ իշխանությունների սկսած նոր արշավը բավական տարօրինակ է։
Հիշեցնենք՝ գլխավոր դատախազությունը պահանջում է Խաչատուր Սուքիասյանին զրկել Երևանի կենտրոնում՝ Աբովյան փողոցում գտնվող «Սիլ պլազայի» սեփականության իրավունքից։ Գործը հասել է վարչական դատարան, եղել է նախնական նիստ։
Դատարանը արգելանք է դրել «Գռզո պլազա» ընկերությանը պատկանող «Սիլ պլազայի» վրա, որ այն հնարավոր չլինի օտարել մինչև վերջնական դատական ակտի կայացումը։
Թե ինչ ընթացք կունենա դատախազության այս դիմումը, մոտ ապագայում պարզ չի լինի, հաջորդ դատական նիստը 2023 թվականի սկզբին է նշանակված։ Այս հանգամանքը, թերևս, փաշինյանական իշխանություններն օգտագործում են իր իսկ խմբակցության պատգամավորին կրնկի տակ պահելու, նրա նկատմամբ մշտապես ճնշումներ գործադրելու համար։
Բազմիցս նշել ենք, որ Խաչատուր Սուքիասյանը սեփական թիմն է ձևավորում «Քաղպայմանագրի» կազմում, փորձում ավելի ուժեղանալ, ավելի մեծ լծակների տիրապետել և գրեթե Նիկոլ Փաշինյանին մրցակից դառնալ՝ իշխանության համար պայքարում։ Տիրապետելով ավելի մեծ ֆինանսական ռեսուրսների, քան Նիկոլ Փաշինյանն է, Խաչատուր Սուքիասյանը նաև, ըստ որոշ տեղեկությունների, անջատողական քայլեր է ձեռնարկել «Քաղպայմանագրի» ներսում։
Հենց թերևս այս հանգամանքով է պայմանավորված իշխանությունների ճնշումները, որ իրենց ընդդիմախոսներին թողած անցել են արդեն յուրայինին ճնշելու գործին։ Ինքը՝ Խաչատուր Սուքիասյանը, չի կարծում, որ իրավական գործընթացներով իշխանությունն իրեն ինչ-որ ուղերձ է փոխանցում, ընդհակառակը, հայտարարել է, թե դատախազության որոշումն իրեն ուրախացնում է, թող պարզեն, թե ի՞նչ է տեղի ունեցել իրականում։
Սուքիասյանը երեկ նաև իշխանություններին քննադատելու կամ իր սեփական անմեղությունը ներկայացնելու փոխարեն Ազգային ժողովում իսկական «բազարի» մեջ էր մտել լրագրողների հետ, վիրավորանքներ էր հասցնում նրանց, ինչպես նաև քաղաքական այլ ուժերի ներկայացուցիչներին՝ մասնավորապես վարկաբեկիչ տեղեկություններ է հայտնել 2-րդ նախագահ Ռոբերտ Քոչարյանի մասին։ Խաչատուր Սուքիասյանին պատասխանել է Ռոբերտ Քոչարյանի որդին՝ Լևոն Քոչարյանը, նշել, թե դատական հայց են ներկայացնելու նրա դեմ։
Ըստ ամենայնի Քոչարյանի դեմ ցեխարձակումներ իրականացնելով՝ Սուքիասյանը փորձում է այդ կերպ Նիկոլ Փաշինյանին ուղերձ հղել, որ ինքը դեռ շարունակում է մնալ գործող իշխանության ջատագովներից մեկը։ Սուքիասյանը ավելի լավ, քան որևէ մեկը, գիտի Նիկոլ Փաշինյանի տեսակը։ Ժամանակին նրա ձեռքից սնված Փաշինյանը պատրաստ է ոտատակ տալ ամեն բան, միայն թե բավարարի իր ստորին բնազդները, պահպանի իշխանությունը։
Անի Մսրյան
