Ոչ մի բառ Արցախի մասին Սոչիի հայտարարության մեջ
ՎԵՐԼՈՒԾՈՒԹՅՈՒՆՆԵՐ
Հայաստանի, Ռուսաստանի և Ադրբեջանի ղեկավարները երեկ հանդիպել են Սոչիում և համատեղ հայտարարություն ընդունել։
Ընդ որում, նրանք պայմանավորվել են զերծ մնալ ուժի կիրառումից և դրա կիրառման սպառնալիքից, քննարկել և լուծել բոլոր խնդրահարույց հարցերը՝ բացառապես ինքնիշխանության, տարածքային ամբողջականության և սահմանների անձեռնմխելիության, փոխադարձ ճանաչման հիման վրա։
Փաշինյանը, Պուտինը և Ալիևը վերահաստատել են ձեռք բերված պայմանավորվածությունները պահելու հանձնառությունը՝ ելնելով հայ–ադրբեջանական հարաբերուությունների համապարփակ կարգավորման, Հարավային Կովկասում խաղաղության, կայունության, անվտանգության և կայուն տնտեսական զարգացման ապահովման շահերից։ Թվով չորրորդ հայտարարությունը 44-օրյա պատերազմից հետո, որևէ բառով չի անդրադառնում Լեռնային Ղարաբաղի և նրա բնակիչների իրավունքներին։
Սա, ըստ էության, հենց Նիկոլ Փաշինյանի պատասխանն էր նախօրեին Ստեփանակերտում տեղի ունեցած բազմամարդ հանրահավաքին։ Արցախցիները, հիշեցնենք, Փաշինյանից պահանջել էին միջազգային հարթակներում չքննարկել Լեռնային Ղարաբաղի հարցը՝ առանց իրենց հետ համաձայնեցնելու և նաև չոտնահարել Արցախի բնակիչների իրավունքները։
Ըստ էության Փաշինյանը, կարելի է ասել, հերթական «կրուտիտն է արել», որևէ կերպ, որևէ բառ չի բարձրացրել Լեռնային Ղարաբաղի բնակիչների մասին։
Խնդրին անդրադադարձել է միայն Ադրբեջանի նախագահ Իլհամ Ալիևը՝ հայտարարելով, թե ղարաբաղյան հակամարտությունը վաղուց պատմություն է, իսկ Ադրբեջանը 2 տարի առաջ լուծել է այս հարցը։ Բաց տեքստով կարելի ասել, որ եռակողմ այս հանդիպումը հերթական անգամ ոտնահարեց Արցախի բնակիչների իրավունքները, իսկ Նիկոլ Փաշինյանը հանդիպումն օգտագործել է բացառապես իր դիրքերն ամրապնդելու համար։ Շատ վերլուծաբաններ, թերևս, արձանագրում են, որ Ադրբեջանը այս հայտարարությունից հետո ընկած ժամանակահատվածն օգտագործելու է Հայասատանի տարածքից զավթած դիրքերում ամրանալու, ռազմական նոր էսկալացիայի պատրաստվելու համար։
Փաշինյանին փոխարենը անհրաժեշտ է ժամանակ, ընդամենը սեփական իշխանության դիրքերն ամրապնդելու համար, և նա չունի որևէ կարմիր գիծ, և ոչ միայն Լեռնային Ղարաբաղի, այլ նաև Սյունիքի բնակչության կյանքի ու անվտանգության հաշվին պատրաստ է ամեն ինչ անել, միայն թե ապահովի իր և իր կլանի իշխանավարումը։
Լիլիթ Կարապետյան
