Փաշինյանին Թեհրան են կանչել անակնկալ կերպով. Ի՞նչ է հասկացնում Իրանը

Սոչիում կայացած հանդիպման ընթացքում տարօրինակ մի հայտարարություն եղավ։ Իրանի նախագահի աշխատակազմի ներկայացուցիչ Մուհամադ Ջամշիդին հայտարարեց, թե Նիկոլ Փաշինյանը այսօր ուղևորվելու է Թեհրան, ուր նրան հրավիրել է Իսլամական Հանրապետության նախագահ Էբրահիմ Ռայիսին։

Ըստ Ջամշիդիի՝ բանակցությունների ընթացքում կողմերը կքննարկեն երկողմ հարաբերություններին վերաբերողմի շարք հարցեր։ Մինչև այսօր առավոտյան հայկական կողմը Նիկոլ Փաշինյանի այցը չէր անոնսավորում, ավելին, մեր տեղեկությունների համաձայն, այս հրավերը անակնկալ է եղել և միայն մամուլում տարածվելուց հետո է, որ Փաշինյանին հայտնել են, որ Իրանում ցանկանում են հանդիպել նրա հետ։

Վաղ առավոտյան վարչապետի աշխատակազմը հաստատեց, որ Փաշինյանը մեկնելու է Իրան, թեև Սոչիից վերադարձել էր ուշ կեսգիշերին և հայկական պատվիրակությունը նույնիսկ չէր հասցրել հանգստանալ։ Հայտնի չէ, թե որն է շտապողականության այս պատճառը, որ իրանական կողմը Հայաստանի վարչապետին, գրեթե իր կամքին հակառակ, հրավիրում է Թեհրան։

Սակայն փաստն այն է, որ բավական լուրջ պատճառներ պետք է լինեն, որպեսզի Իրանի իշխանությունները իրենց նման ոչ դիվանագիտական վարք դրսևորեն և Փաշինյանին հրավիրեն «Տիզբոն»։

Բանն այն է, որ իրանական կողմը լուրջ կասկածներ ունի Հայաստանի գործող վարչախմբի գործողությունների և վարքի անկեղծության մեջ և փորձում է հասկանալ ՝ որքանով է պատրաստ Հայաստանի իշխանությունը պաշտպանել սեփական երկրի ինքնիշխան տարածքը։ Այն, որ Հայաստանի տարածքային ամբողջականությունը կարմիր գիծ է Իրանի համար, այդ երկրի իշխանությունները բազմիցս հայտարարել են, սակայն իրենք էլ այդ հարցում լրջագույն կասկածներ ունեն փաշինյանական իշխանության նկատմամբ։

Եվ այժմ, Սոչիում կայացած հանդիպումից հետո, կանչում են Նիկոլ Փաշինյանին տեղում արագ ծանոթանալու իրավիճակին՝ սեփական գործողությունները պլանավորելու համար։ Ամեն դեպքում Իրան այցը բավականին մտահոգիչ և լուրջ հետևանքներ կարող է ունենալ։

Տաթև Հախնազարյան