Նույնիսկ բյուջե օգտագործում են կեղծ մեղադրանքների համար

Հայաստանի Ազգային ժողովի հանձնաժողովներում մեկնարկել է 2023 թվականի պետական բյուջեի քննարկումները։ 2023 թվականի բյուջեն ամենամեծն է լինելու, ֆինանսների նախարար Տիգրան Խաչատրյանի խոսքով, գրեթե 6,4 միլիարդ դոլար։Բյուջեով նաև նախատեսվում է ռազմական ծախսերի աննախադեպ բարձրացում և այն հասնելու է գրեթե 1 միլիարդ 300 միլիոն դոլարի։

Այս հանգամանքը լուրջ առիթ է դարձել փաշինյանական վարչախմբի համար, հերթական քարերը նետելու նախկին իշխանությունների հասցեին, հայտարարելու, թե իրենք ավելի շատ են ծախսում Հայաստանի պաշտպանողականության վրա։ Թերևս վերջին շրջանում տնտեսական որոշակի ակտիվացումը, ինչպես նաև պետեկամուտների կոմիտեի կողմից մեծ քանակությամբ մուտքերը առիթ են տվել Փաշինյանին սլաքները կրկին ուղղել նախկինների ուղղությամբ՝ հայտարարելով, թե նրանք որևէ լուրջ գործողություն չեն իրականացրել ժամանակին տնտեսական ակտիվության համար։

Փաստն այն է,որ Հայաստանում մշտապես էլ համախառն ներքին արդյունքի զգալի մասը հատկացվել է պաշտպանական նպատակներով։ Եվ ըստ էության Նիկոլ Փաշինյանը առանձնապես մեծ ջանքեր չի գործադրում, ուղղակի հավաքագրված ավելի մեծ գումարից, ավելի մեծ կտոր է կարողանում փոխանցել պաշտպանողականությանը, իսկ այն, որ Հայաստանի պաշտպանողականությունը վաղուց այլևս լրջագույն սպառնալիքի տակ է, հաստատել է գլխավոր շտաբի պետ Էդվարդ Ասրյանը։

Երեկ նա նույնիսկ Ազգային ժողովում հերքել է վարչապետի և իշխանական ֆրակցիայի այլ ներկայացուցիչների հայտարարությունները։ Հիշեցնենք, Փաշինյանը հայտարարում էր, թե որ 2021 թվականի մայիսից հետո 10 քառակուսի կմ-ն ադրբեջանցիները օկուպացրել են։

Պատգամավոր Արմեն Խաչատրյանն էլ օրերս ՀԱՊԿ մի նիստում նշեց 127 քառակուսի կմ-ը։

Ըստ գլխավոր շտաբի պետի առնվազն 130 քառակուսի կմ տարածք ադրբեջանական կողմը ոչ միայն օկուպացրել է Հայաստանի ինքնիշխան տարածքից, այլև ամրապնդվում է։ Ավելին ադրբեջանցիները թույլ չեն տալիս հայկական կողմին ինժեներական աշխատանքներ իրականացնել նաև դուրս բերել զոհված զինծառայողներից մեկի դիակը։

Եվ այս պայմաններում գործող իշխանությունների կողմից հայտարարությունները, թե իրենք ավելի մեծ միջոցներ են ձեռնարկում Հայաստանի բանակի մարտունակության բարձրացման վրա, ոչ այլ ինչ է, քան տարրական երկերեսանություն։

Հիշեցնենք՝ 2016 թվականին 800 հեկտար տարածքի զավթումից հետո Նիկոլ Փաշինյանը վայնասուն էր բարձրացրել՝ Սերժ Սարգսյանին մեղադրելով Հայաստանի տարածքը Ադրբեջանին զիջելու մեջ, իսկ այժմ, նա ոչ միայն Ադրբեջանին է հանձնել Արցախի տարածքի երեք քառորդ մասը, այլ նաև 130 քառակուսի կմ-ից ավելի տարածք Հայաստանի ինքնիշխան տարածքից։ 

Աննա Նադոյան