ՀԱՊԿ-ն երեք մատի կոմբինացիա ցույց տվեց Փաշինյանին

Երեկ տեսակոնֆերանսի ձևաչափով տեղի է ունեցել ՀԱՊԿ հավաքական անվտանգության խորհրդի արտահերթ նիստը, որտեղ քննարկվում էր Հայաստանի առաջարկը ադրբեջանական ագրեսիային ՀԱՊԿ-ի կողմից հստակ քաղաքական գնահատական տալու և Հայաստանի տարածքային ամբողջականությունը վերականգնելու ուղղությամբ ճանապարհային հստակ քարտեզի ձևավորման անհրաժեշտության վերաբերյալ։

ՀՀ վարչապետի աշխատակազմի տարածած հաղորդագրության մեջ ընդամենը պաշտոնական մեղմ ձևակերպումներ են, նշվում է, թե իբր Փաշինյանը փաստել է, թե գլխավոր քարտուղարի զեկույցը արտահայտում է առկա իրողություները՝ մասնավորապես ադրբեջանական ստորաբաժանումների կողմից ՀՀ ինքնիշխան տարածքներ ներխուժման փաստը և դրա կրկնության վտանգը, ինչպես նաև ելման դիրքեր վերադառնալու անհրաժեշտությունը։

Նիստի արդյունքներով ՀԱՊԿ երկրների ԱԳ նախարարներին տրվել է որոշման նախագիծ՝ համաձայնեցնելու հանձնարարական, ասվում է հաղորդագրութունում։ Ավելի ուշ արդեն, նիստի մասնակից մի քանի երկրների ղեկավարներ տարածեցին իրենց խոսքի տեսագրությունները, որտեղ պարզ էր դառնում, որ ՀԱՊԿ-ն պարզապես 3 մատի կոմբինացիա է ցույց տվել Նիկոլ Փաշինյանին և նրան պարզ, հստակ հասկացրել, որ այդ կառույցը որևէ կերպ մտադիր չէ աջակցելու ՀՀ պահանջներին։

Ավելին, Բելառուսի նախագահ Ալեքսանդր Լուկաշենկոն ծաղրել և նվաստացրել է Նիկոլ Փաշինյանին, հայտարարել, թե Հայաստանն ու Ադրբեջանը ոչ միայն մեկ պետության մաս են եղել, այլև ԱՊՀ տարածքում բոլորի համար բարեկամ են։ «Մենք շատ սերտ կապեր ունենք ուղղափառ Հայաստանի հետ, որը մեզ հարազատ է և մահմեդական Ադրբեջանի հետ, որը մեզ շատ հարազատ է»,- ասել է Լուկաշենկոն։ «Եվ հետո՝ Ադրբեջանն այստեղ ներկա պետությունների երկրների ղեկավարների թշնամի՞ն է, թե՞ հակառակորդն է», -ասել է Լուկաշենկոն՝ ընթացքում մոռանալով, որ Ադրբեջանը ՀԱՊԿ անդամ չէ, իսկ Հայաստանին աջակցել իրենք պարտավոր են նույն այդ կառույցի օրենսդրությամբ։

«Ինչի՞ համար եք պայքարում, այս 2000 կմ բարձրության սարերում կործանեցիք 300 մարդու այնտեղ, որտեղ մարդիկ չեն ապրում, որտեղ նույնիսկ այծեր չեն լինում, ինչո՞ւ եք կռվում, նստեք երկուսով համաձայնության եկեք և թող Ռուսաստանը վավերացնի այդ համաձայնագիրը»,- ասել է Լուկաշենկոն և շարունակել․ «Դուք պահանջեցիք, որ մենք հայտնենք մեր դիրքորոշումը, դուք չգիտե՞ք դիրքորոշումը, մենք ցանկանում ենք, որ հարևան պետությունների միջև հակամարտությունը կարգավորվի խաղաղ ճանապարհով, երկրորդ հարցը՝ տվեք Հայաստանի տարածքային ամբողջականության վերականգնման ճանապարհային քարտեզ, ի՞նչ ճանապարհային քարտեզ, ես Ձեզ անմիջապես կպատասխանեմ, նստեք, խոսեք Իլհամ Ալիևի հետ, եթե հարկավոր է ,խնդրեք Ռուսաստանի նախագահին և որոշում կայացրեք, չկայացնեք այսօր, վաղն ավելի վատ կլինի»,- պարզապես սպառնացել է Լուկաշենկոն։

Լուկաշենկոյի այս հայտարարությունը հստակ ապացուցում է, որ այդ կառույցը որևէ կերպ մտադիր չէ աջակցել Հայստանին, ընդհակառակը, միայն սպառնալիքներ է տեղում, և սրանից հետո Հայաստանի իշխանությունները կամ պետք է հստակ դիրքորոշում արտահայտեն ՀԱՊԿ-ի վերաբերյալ, կամ էլ շարունակեն գլխիկոր լսել իրենց հասցեին հնչող ծաղրական խոսքերը։

Ելենա Գուլքանյան