Ռուսաստանը չափազանց զգայուն է արձագանքում Հայաստանում կատարվող իրադարձություններին
ՎԵՐԼՈՒԾՈՒԹՅՈՒՆՆԵՐ
Երեկ ուշագրավ երկու տեղեկություն է հայտնի դարձել, որոնք վկայում են, որ Ռուսաստանը չափազանց զգայուն է արձագանքում Հայաստանում կատարվող իրադարձություններին և մտադիր է մինչև վերջ պաշտպանել իր շահերը։ Այսօր տեղի է ունենալու ՀԱՊԿ արտահերթ նիստ, նախատեսվում է քննարկել Հայաստան գործուղված կազմակերպության առաքելության աշխատանքի արդյունքները՝ կապված հայ-ադրբեջանական սահմանին իրավիճակի սրման հետ։
Քննարկելու են նաև Հայաստանին օգնություն ցուցաբերելու համատեղ միջոցառումներ, այն ինչի մասին տևական ժամանակ հայտարարում և Ռուսաստանին մեղադրում է Հայաստանի գործող վարչախումբը, թե իբր ՀԱՊԿ-ն ձեռնպահ է մնում Հայաստանին օգնելուց։
Ի դեպ, ՌԴ նախագահի մամուլի քարտուղար Դմիտրի Պեսկովը հայտնել է, թե Վլադիմիր Պուտինը մտադիր է մասնակցել ՀԱՊԿ ղեկավարների նիստին, անձամբ ներկայացնել Ռուսաստանի դիրքորոշումները։ Այս պայմաններում տարօրինակ չէ, որ ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է քաղաքական գործիչ Կոստանտին Զատուլինի և «Russia today»-ի տնօրեն Մարգարիտա Սիմոնյանի Հայաստանի մուտքի արգելքի մասին տեղեկությանը, նշել, թե Մոսկվան տարակուսանքով է ընդունել այդ փաստը։
«Այս տեղեկությունը դժվար է որակել որպես մեր հարաբերությունների դաշնակցային բնույթին համապատասխանող քայլ, երբ Երևանից պաշտոնական պատասխան ստանանք, այդ ժամանակ կորոշենք հետագա գործողությունները, արձագանքները և այլն»,- նշել է Մարիա Զախարովան։
Ըստ էության պարզաբանում պահանջելու Մոսկվայի այս քայլը ևս մեկ հնարավորություն է փաշինյանական վարչախմբին իր դեմքը պահպանելու, հրաժարվելու հայ-ռուսական դաշնակցային հարաբերությունները փչացնելու քաղաքականության վարումից։
Բնավ չի բացառվում, որ հայկական կողմը փորձի ձախողել թե՛ ՀԱՊԿ նիստը և թե՛ Ռուսաստանի ԱԳՆ-ին լպիրշ մի որևէ պատասխան տա։ Այս պարագայում էլ ցանկացած հետևանքի համար պատասխանատվությունը կրելու է Հայաստանի գործող վարչախումբը ՝ Նիկոլ Փաշինյանի գլխավորությամբ։
Որքան էլ Ռուսաստանը տանել չի կարողանում Փաշինյանին և մտադիր է ամեն գնով հասնել նրա հեռացմանը իշխանությունից, առայժմ՝ այս պահին, ռազմավարական դաշնակիցը դեռ փորձում է պահպանել ՀՀ իշխանությունների դեմքը, հեռու պահել կործանարար ընթացքից։
Ելենա Գուլքանյան
