«Քաղպայմանագրի» վարչության ընտրությունները կարող են հեղաշրջման հանգեցնել Հայաստանում

Հոկտեմբերի 29-ին կայանալու է «Քաղաքացիական պայմանագիր» կուսակցության համագումարը, որտեղ նոր վարչություն են ընտրելու։

Առաջադրված 48 թեկնածուներից վարչության կազմում ընդգրկվելու են 15-ը, որոնք էլ կդառնան Նիկոլ Փաշինյանի մերձավոր շրջապատը, իսկ երկրի կառավարման կարևորագույն որոշումները կկայացվեն հենց այդ վարչությունում, այլ ոչ թե կառավարությունում, կամ Ազգային ժողովում։

Հենց սա է պատճառը, որ «Քաղաքացիական պայմանագրի» առաջատար դեմքերը փորձում են ոչ միայն իրենք գտնվել ՔՊ վարչության կազմում, այլև իրենց մտերիմներին և ընկերներին ևս խցկել այնտեղ՝ վարչության կազմում հնարավորինս մեծ ներկայություն ապահովելու համար։

ՔՊ մեր աղբյուրի փոխանցմամբ, վերջին օրերին ուշադրություն չդարձնելով երկրում ստեղծված ծանրագույն իրավիճակի վրա, փաշինյանականները շարունակել են իրենց ակտիվ քարոզարշավը, փորձում են պարզել, թե ով որքան քվե ունի, ում կարող են քաշել իրենց կողմը։

Ավելին, մեր աղբյուրը նշում է, թե իրենք լուրջ մտավախություն ունեն, որ առնվազն մի քանի կլանների ուժեղացման, վարչությունում նրանց դիրքերի ամրապնդման պարագայում, հնարավոր է ներիշխանական հեղաշրջման վտանգ հասունանա։ Մասնակի իշխանափոխության տարբերակը ոչ թե Ազգային ժողովն է կամ Կառավարությունը, այլ հենց «Քաղաքացիական պայմանագրի» վարչությունը, որն էլ վերջնարդյունքում կայացնում է կարևորագույն վճիռները։

Մինչ օրս Նիկոլ Փաշինյանին հաջողվել է իր առանցքային և հատկապես հին կողմնակիցների միջոցով սանձել կուսակցականների կենտրոնախույս նկրտումները, սակայն չի բացառվում, որ կլաններից որևէ մեկի ուժեղացման դեպքում Փաշինյանը զրկվի իր հենարանից և ստիպված լինի զիջել իշխանությունը, որքան էլ դա չցանկանա։

Ըստ էության, 48 հոգանոց ցուցակը նայելու դեպքում կարելի է պարզ եզրակացնել, թե կոնկրետ ովքեր են առավել շահագրգռված վարչությունում մեծ ներկայացվածություն ապահեվելու, այս կերպ Նիկոլ Փաշինյանին կուսակիցների հենարանից զրկելու և իշխանափոխություն իրականացնելու հարցում։

Աննա Նադոյան