Արցախի և Հայաստանի իշխանությունների տարաձայնությունները՝ լուրջ խնդիր
ՎԵՐԼՈՒԾՈՒԹՅՈՒՆՆԵՐ
Արցախի իշխանությունների պատվիրակության երևան կատարած այցի շրջանակներում, կարևորագույն հարցերից մեկը նաև երկու երկրների արտաքին քաղաքական վեկտորների և դրանց շուրջ քննարկումներին է վերաբերում։ Մեր տեղեկություններով՝ Արցախում չափազանց դժգոհ են Հայաստանի գործող իշխանությունների դեպի արևմուտք կտրուկ շրջադարձից։
Արցախը, որը 44-օրյա պատերազմից հետո գտնվում է ռուսական ազեցության տիրույթում, իսկ Արցախի անվտանգության ապահովումն ամբողջությամբ կախված է Ռուսաստանից, Հայաստանի իշխանությունների արտաքին քաղաքականությունը լուրջ տարակուսանք է առաջացնում։ Նույնիսկ, ըստ մամուլի, տեղեկություններ կան, որ Հայաստանի արտգործնախարար Արարատ Միրզոյանն ու Արցախի արտգործնախարար Դավիթ Բաբայանը տևական ժամանակ իրար հետ չէին շփվում, գրեթե մեկ տարուց ավելի, քանի որ Արարատ Միրզոյանին նյարդայնացնում էր Դավիթ Բաբայանի ակնհայտ ռուսամետ դիրքորոշումները։
Նշվում է, որ վերջին այցի ընթացքում Արայիկ Հարությունյանին հաջողվել է հաշտեցնել նրանց, իսկ Նիկոլ Փաշինյանը հանձնարարել է ավելի ակտիվ շփվել Արցախի իշխանությունների հետ՝ ներկայացնելով հնարավոր զարգացումները և լուծել առկա խնդիրները։
Բանն այն է, որ Հայաստանի իշխանությունների այս կտրուկ մոտեցումը մի գուցե կարող է որոշակի քաղաքական դիվիդենտներ բերել փաշինյանական իշխանությանը, սակայն արդյունքում վտանգում է Արցախի քաղաքացիներին, տասնյակ հազարավոր մեր հայրենակիցներ, որոնք մնացել են բացառապես ռուսական խաղաղապահ զորակազմի ողորմածության հույսին, չեն կարողանում հասկանալ, թե որն է փաշինյանական վարչախմբի քաղաքականության բուն նպատակը։ Իհարկե, չափազանց հեշտ է հայտարարել «սորոսական», և այդ տերմինը շահագործելով՝ անընդհատ մեղադրանքներ հասցեագրել միմյանց։
Սակայն խնդիրն ավելի խորքային լուծում և պատկերացումներ է պահանջում։ Ըստ էության Հայաստանի իշխանությունը որոշակի չափով նաև ստիպված է նման քայլեր կատարել՝ հստակ գիտակցելով դրա հետևանքները։ Քանիցս նշվել է, որ Եվրոպան և Միացյալ նահանգներն են որոշ հարցերում նպաստել, ինչպես մի շարք ռազմագերիների վերադարձի, այնպես էլ Ադրնբեջանի հարձակումները զսպելու հարցում, իսկ Ռուսաստանը, որն ավելի շատ զբաղված է Ուկրաինայով, առանձնապես ակտիվ չէր մինչև վերջին ժամանակներս։
Մեր աղբյուրների փոխանցմամբ՝ Հայաստանի և Արցախի իշխանությունների միջև նաև պայմանավորվածություն է ձեռք բերվել շատ հարցերում միմյանց հետ խորհրդակցել, հատկապես արտաքին քաղաքականության մեջ համադրել մոտեցումները, որպեսզի խուսափեն հնարավոր խնդիրներից։
Մանե Եղիկյան
