Ալեն Սիմոնյանը Մոսկվայում ուշագրավ հանդիպումներ է ունեցել, որոնց մի մասը չի լուսաբանվել

Ազգային ժողովի նախագահ Ալեն Սիմոնյանն արդեն 4 օր է՝ գտնվում է Ռուսաստանում, ընդ որում, պաշտոնական հանդիպումներ ունեցել է միայն առաջին երկու օրը։

Տարօրինակ այդ պատվիրակության կազմով, որի կազմում է նաև ընդդիմության ներկայացուցիչ, նախկին քաղաքապետ Տարոն Մարգարյանը, Ալեն Սիմոնյանը հանդիպումներ է ունեցել Պետդումայի դաշնային խորհրդի նախագահների, ինչպես նաև խորհրդարանական մի քանի խմբակցությունների հետ։ Արդեն երկու օր է՝ որևէ պաշտոնական հանդիպման մասին տեղեկություն չկա։

Ինչպես ավելի վաղ նշել էինք՝ Ալեն Սիմոնյանի հետ հանդիպելու ցանկություն ունեն ռուսական ուժային որոշակի կառույցներ, նրան ինչ-որ բաներ հասկացնելու, կարգի հրավիրելու, ինչպես նաև Հայաստանում հնարավոր զարգացումները բացատրելու առումով։ Ռուսաստանյան մեր աղբյուրների փոխանցմամբ, ԱԺ նախագահի հետ քննարկել են Հայաստանում մասնակի իշխանափոխություն իրականացնելու սխեման, պարզ բացատրել, որ Նիկոլ Փաշինյանը լրիվ ռելսերից դուրս է եկել և Ռուսաստանում որևէ մեկն այլևս չի ցանկանում նրա հետ գործ բռնել։

Ընդսմին, ռուսները նշել են, թե Փաշինյանն ու իր իշխանության որոշ ներկայացուցիչներ փորձում են փոխել արտաքին քաղաքական վեկտորը։ Փաշինյանը կարծում է, թե ռուսներն այնքան թույլ են, որ կարող է իրեն թույլ տալ թռչել եվրոպացիների կամ ամերիկացիների գիրկը։ Այդ դեպքում ռուսական ուժային շրջանակները կարող են մասնակի իշխանափոխության սխեման իրականացնել, իսկ այդ տարբերակում դիտարկվում է Ալեն Սիմոնյանի թեկնածությունը որպես տրանզիտային վարչապետ։ Նրան պարզորոշ ասել են, որ ռուսաստանյան կոմպետենտ օրգանները հավանություն են տալիս այսպիսի ծրագրին, նշել են նաև, թե իրենց հաշվարկներով Ալեն Սիմոնյանը խորհրդարանում ունի 10-11 հոգի, որոնք իր այսպես կոչված, կլանի անդամ են և պետք է նրանք պատրաստ լինեն, որ անհրաժեշտության պահին միանան խորհրդարանական ընդդիմությանը և քվեարկեն Նիկոլ Փաշինյանի դեմ։

Այս հանդիպումները, ինչպես և սպասելի էր, որևէ կերպ չեն լուսաբանվել հայկական մամուլում, սակայն Ալեն Սիմոնյանը Ռուսաստան է մեկնել հիմնականում իր կլանի ներկայացուցիչների և Ռուսաստանում կապեր ունեցող անձանց հետ, ինչն էլ ավելի է խորացնում նման սխեմայի գործարկման հավանականությունը։

Տիգրան Խաչատրյան