Փաշինյանականները ցինիզմով զավթեցին ԿԸՀ-ն

Ցինիզմով և անթաքույց լկտիությամբ Ազգային ժողովը երեկ ընտրեց Կենտրոնական ընտրական հանձնաժողովի նոր կազմ։

Տակավին, երեք օր առաջ «Քաղպայմանագրի» վարչության անդամությունից և պատգամավորի մանդատից հրաժարված Վահագն Հովակիմյանին, որն իր ամբողջ կյանքի կարիերային, ինչպես նաև Խորհրդարանում հայտնվելու հարցում պարտական է Նիկոլ Փաշինյանին, ՔՊ-ն 65 ձայնով ընտրեց Կենտրոնական ընտրական հանձնաժողովի նախագահ։

Եվս 6 անձանց, որոնցից շատերը նախկինում ևս եղել են ԿԸՀ անդամներ և առանձնապես չեն փայլել արդար և թափանցիկ ընտրություններ անցկացնելու իրենց մղումներով, ՔՊ-ն ընտրեց ԿԸՀ անդամներ։

Ընդդիմությունը չի մասնակցել Ազգային ժողովում կայացած քննարկումներին և քվեարկությանը, և 65 կողմ, 0 դեմ ձայների հարաբերակցությամբ բոլոր 7 թեկնածուներն էլ ընտրվել են։

Նույնիսկ փաշինյանական իշխանությանը լոյալ իրավապաշտպանները արձանագրում էին, թե սա ակնհայտ հետընթաց է ժողովրդավարությունից և, կուսակցական գործչին Կենտրոնական ընտրական հանձնաժողովի նախագահ նշանակելը, առնվազն անհեթեթ է և ստվերելու է ընտրությունների ամբողջ գործընթացը։ Փաշինյանական իշխանությանը, սակայն, այս կոչերը բացարձակապես չեն անհանգստացնում։

Ընդամենը մեկ օրվա ընթացքում ոչ միայն Կենտրոնական ընտրական հանձնաժողովը յուրացրեց «Քաղապայմանագիրը», այլ Բարձրագույն դատական խորհուրդը։ Նախօրեին ԲԴԽ անդամներ ընտրված Կարեն Անդրեասյանից և Երանուհի Թումանյանցից մեկ օր պահանջվեց ԲԴԽ-ում «հեղաշրջում» իրականացնելու։

Արդարադատության նախկին նախարար Կարեն Անդրեասյանն այլևս ԲԴԽ նախագահն է։ Նա, որ ժամանակին որևէ խնդիր չէր տեսնում Նիկոլ Փաշինյանի նկարը իր գլխավերևում փակցնելու համար և հայտարարում էր, թե նկարը իրեն միայն սթափեցնում է, այժմ էլ այդ նկարով և անհնազանդ դատավորների ցուցակով գնացել է ԲԴԽ՝ դատական իշխանությանը վերջնականապես կործանելու նպատակով։

Փաստենք, որ առայժմ միայն մամուլի մի հատվածն է մնացել անկախ և չի ենթարկվում Փաշինյանին։ Գործող իշխանությունները, սակայն, ամեն ջանք գործադրում են՝ անկախ մամուլին էլ վնասելու, կամ իրենց տակ մտցնելու հարցում։

Ժորա Մեհրաբյան