Դատական իշխանությունն այլասերելու գործընթացը գնում է լայն թափով
ՎԵՐԼՈՒԾՈՒԹՅՈՒՆՆԵՐ
Գործող վարչախմբի դեմ անկախ դատավորների պայքարի խորհրդանիշ դարձած դատավոր Ալեքսանդր Ազարյանին բարձրագույն դատական խորհուրդը երեկ զրկել է դատավորի լիազորություններից։
Ըստ ԲԴԽ տարածած հաղորդագրության՝ Ալեքսանդր Ազարյանի լիազորությունները դադարեցվում են նրա դիմումի հիման վրա։ Ինքը՝ Ազարյանը, որևէ կերպ չի մեկնաբանել տեղի ունեցածը՝ միայն մի փոքր պատճառաբանություն է տարածել, թե նա դիմումը ներկայացրել է առողջական խնդիրների պատճառով։
Դատական համակարգում, մեր աղբյուրների փոխանցմամբ, դատավորների միության նախագահի այս քայլը չափազանց անսպասելի է եղել և ցնցել դատական համակարգի հիմքերը։ Չի բացառվում, որ Ազարյանի նկատմամբ ճնշումներ են գործադրվել գործող իշխանության և նրա հատուկ ծառայությունների կողմից։
Եվս մեկ պատճառ կարող է լինել գործող իշխանությունների բուռն ցանկությունը Բարձրագույն դատական խորհրդի նախագահի պաշտոնում նշանակել Արդարադատության գործող նախարար Կարեն Անդրեասյանին։
Վերջինս դարձել է փաշինյանական իշխանության կարկառուն ներկայացուցիչներից մեկը, տևական ժամանակ իսկական արշավ է սկսել անկախ դատավորների դեմ՝ փորձելով նրանց հեռացնել պաշտոններից, փոխարենը նշանակել վարչախմբի բոլոր ցանկությունները անմռունչ դակող, անինքնասեր անձանցով։ Դատավորները երեկ հավաքվել են Աջափնյակի նստավայրում՝ քննարկելու, թե առաջիկայում ինչ պետք է անեն։
Ալեքսանդր Ազարյանի դիմումից հետո նա զրկվելու է դատավորների միության նախագահի պաշտոնից, և այդ պաշտոնում դատավորները պետք է նոր նախագահ ընտրեն։
Առայժմ դեռ որոշում չեն կայացրել, թե ով կարող է դառնալ դատավորների միության նախագահը, սակայն փաստն այն է, որ Փաշինյանը հետևողականորեն ցնցում է դատական համակարգի հիմքերը, քանի որ գործադիր և օրենսդիր իշխանությունները զավթելուց հետո նրա հիմնական թիրախը դարձել է դատական իշխանությունը, որտեղ դեռևս մի փոքր խումբ անկախ դատավորներ կարողանում են պայքարել գործող իշխանությունների դեմ և ոչ թե պարտադրանքով վճիռներ են կայացնում, այլ իրավականորեն հիմնավորված։
Սարգիս Թորոսյան
