Նախկին նախագահների հանդիպումը լրջագույն հույսեր է առաջացրել հանրության շրջանում

Հայաստանի երեք նախկին նախագահները՝ Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը, Արցախի նախկին նախագահներ՝ Բակո Սահակյանն ու Արկադի Ղուկասյանը, երեկ հավաքվել են Մայր Աթոռ Սուրբ Էջմիածնում։ Հանդիպմանը մասնակցել է նաև Վեհափառ Հայրապետը։

Ողջ օրվա ընթացքում տեղեկություն չկար հնարավոր հանդիպման մասին, միայն երեկոյան ուշ հայտնի դարձավ, որ Վեհարանում կայանալու է այդ հանդիպումը։ Մինչև անցած շաբաթ Լևոն Տեր-Պետրոսյանը իր առանձնատանը հանդիպել էր Ամենայն Հայոց Կաթողիկոսին, քննարկել էին Հայաստանում ու Արցախում տիրող իրավիճակն ու դրանից բխող լուծումները, իսկ երեկվա հանդիպումից հետո Մայր Աթոռից հայտնել են, թե Հայաստանում ստեղծված իրավիճակի առնչությամբ տեղի է ունեցել շահագրգիռ քննարկում, որոշում է ընդունվել շարունակել հանդիպումները։

Փաստացի կարելի է նշել, որ առայժմ շոշափելի և լուրջ արդյունք կա՛մ չի եղել, այլապես Մայր Աթոռը այդ բովանդակությամբ հաղորդագրություն կտարածեր, կա՛մ էլ այնպիսի որոշումների են հանգել, որոնք առայժմ այս պահին հրապարակման ենթակա չեն։

Ինքնին, այստեղ խնդիրը ոչ թե հնարավոր հաղորդագրությունն էր բուն անելիքների վերաբերյալ, ինչի ժամանակը դեռևս կգա, այլ նման լայն ընդգրկում ունեցող հանդիպումը, երբ հավաքվում են Արցախի և Հայաստանի նախկին նախագահները՝ քննարկելու երկու երկրների առջև ծառացած բազմաթիվ, լրջագույն խնդիրները։

Դեռևս խորհրդարանական արտահերթ ընտրություններից առաջ Լևոն Տեր-Պետրոսյանը առաջարկել էր հավաքվել և քննարկել ստեղծված իրավիճակը, փորձել համատեղ ուժերով պայքարել։ Պայմանը մեկն էր, որ երեք նախագահներից և ոչ մեկը չի առաջադրելու իր թեկնածությունը։ Այն ժամանակ համաձայնությունը չկայացավ, ի պատիվ պետական այրերի, այս անգամ թերևս հանդիպումը կայացավ և կարող է շոշափելի և լուրջ արդյունքներ տալ։

Միով բանիվ, հարկ է ընդգծել, որ փաշինյանական ապիկար վարչախմբի և Արցախում լավ կամակատար Արայիկ Հարությունյանի պաշտոնավարման օրոք այլևս անհնար է լրջագույն փոփոխություններ իրականացնել երկրում և մարդիկ, ովքեր իրենց ողջ կյանքը նվիրել են Հայաստանի անկախությանն ու Արցախի ազատագրմանը, չեն կարող մի կողմ քաշված մնալ և պարտավորված են մի կողմ դնել մանր տարաձայնությունները՝ հանուն ընդհանուր մեծ գործի։

Ինչևէ, փաստն այն է, որ այս հանդիպումը լրջագույն հույսեր է առաջացրել հանրության շրջանում, իսկ հետագա զարգացումների մասին հայտնի կդառնա առաջիկայում։

Տարոն Մինասյան