Ռազմաքաղաքական խորհրդի անհրաժեշտությունը

Ադրբեջանական ագրեսիայից հետո ստեղծված ներքաղաքական ծանր իրավիճակը պարտադրում է ընդդիմադիր ուժերին համախմբվել և նոր նախաձեռնություններով հանդես գալ։

ԶԼՄ-ները ամեն օր գրում են հնարավոր հանդիպումների մասին, մասնավորապես առավելագույն ձևաչափը, որով կարող է տեղի ունենալ ընդդիմադիր առաջնորդների հանդիպումը, այսպես կոչված ռազմաքաղաքական խորհրդի ստեղծման հնարավորությունն է, որում կարող են ներառվել Հայաստանի նախկին 3 նախագահները, պաշտպանության նախարարները, վարչապետները, Արամ 1-ին և Գարեգին Բ կաթողիկոսները։

Ռազմաքաղաքական խորհրդի ստեղծումը օրհասական կարևորության խնդիր է Հայաստանի համար, միայն այսպիսի կառույցը կկարողանա պարտադրել Նիկոլ Փաշինյանին հրաժարական տալ և հեռանալ, իսկ այդ խորհուրդը ժամանակավորապես իր վրա կվերցնի երկրի ղեկավարման պատասխանատվությունը։ Նշենք, որ նման մի առաջարկ էլ արվել էր 44-օրյա պատերազմի ժամանակ, ինչը հարուցել էր գործող վարչախմբի բուռն դժգոհությունը, ընդհուպ Նիկոլ Փաշինյանը եթերում մեղադրանքներ է հասցեագրել նախկին նախագահներ Լևոն Տեր-Պետրոսյանին և Ռոբերտ Քոչարյանին։

Իրավիճակը սակայն այժմ արմատական կերպով տարբերվում է։ Եթե մինչև նոյեմբերի 9-ը Նիկոլ Փաշինյանի վարկանիշը այսպիսի աղետալի ցածր չէր, ապա այժմ արդեն, երբ ակնհայտ է, թե ուր է տարել փաշինյանական վարչախմբի կառավարումը, վստահաբար կարելի է նշել, որ ռազմաքաղաքական խորհուրդը կկարողանա ստիպել Փաշինյանին հեռանալ իշխանությունից։ Ի դեպ ակնհայտ է, որ նման խորհրդի ստեղծումը քննարկվում է բոլոր մակարդակներում՝ սկսած առաջին նախագահի շրջապատից, վերջացրած «Քաղաքացիական պայմանագրի» մի որոշ գիտակից հատված։

Նույնիսկ իշխող ուժի շրջանակներում են հասկանում, որ Նիկոլ Փաշինյանը դուրս գրված ֆիգուր է և ոչինչ չի կարող անել, ուստի հարկավոր է օր առաջ ազատվել նրանից և երկիրը դնել վերականգնման և զարգացման ռելսերի վրա։

Արամ Մինասյան