ԱՄՆ-ը աննախադեպ ակտիվացել է կարգավորման գործընթացում

ԱՄՆ ներկայացուցիչների պալատի նախագահ Նենսի Փելոսիի այցից հետո, լավ հնարավորություն է ստեղծվել ամերիկյան կողմի համար կրկին ընդգծելու իր ներկայությունը ղարաբաղյան հակամարտության կարգավորման գործընթացում։

Նյու Յորքում ՄԱԿ ԳԱ գագաթնաժողովի շրջանակներում, ԱՄՆ պետքարտուղար Էնթոնի Բլինքենի միջնորդությամբ տեղի է ունեցել Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեյհուն Բայրամովի հանդիպումը։

Հայաստանի ԱԳՆ տարածած հաղորդագրության համաձայն՝ Արարատ Միրզոյանը ընդգծել է, որ ադրբեջանական զինված ուժերը պետք է դուրս բերվեն Հայաստանի ինքնիշխան տարածքից, ուժի կամ ուժի սպառնալիքի կիրառումն անընդունելի է, իսկ հետագա էսկալացիաների կանխարգելման նպատակով պետք է ներդրվեն միջազգային մեխանիզմներ։

Հայաստանի արտգործնախարարը կարևորել է հումանիտար խնդիրների՝ այդ թվում ռազմագերիների հայրենադարձման շուտափույթ կարգավորումը, վերահաստատել է հայկական կողմի պատրաստակամությունը՝ ներգրավվելու հարաբերությունների համապարփակ կարգավորման գործընթացում։

Փաստացի Միացյալ Նահանգները ներկայացուցիչների պալատի նախագահի այցով և այս եռակողմ հանդիպմամբ նշանավորում է իր ակտիվացումը՝ ղարաբաղյան կարգավորման գործընթացում թե՛ Ռուսաստանին, թե՛ մյուս միջազգային խաղացողներին տեղեկացնելով, որ իրենք թույլ չեն տա առանց ԱՄՆ ներգրավվածության որևէ հարցի կարգավորում Հարավային Կովկասում։

Բազմաթիվ փորձագետներ նշում են, որ Միացյալ Նահանգների վերջին շրջանի պասիվությունը ինչ-որ տեղ սուբյեկտիվ և արհեստական էր, և այժմ այլևս ԱՄՆ-ն ունի բոլոր հնարավորությունները ամբողջությամբ ներգրավվելու կարգավորման գործընթացին։

Դրական կլինի՞ արդյոք այս հանգամանքը Հայաստանի և Արցախի համար, թե՞ կարող է նորանոր խնդիրներ հարուցի, բարդ է ասել, հատկապես, որ հայկական կողմից հնչող՝ ՀԱՊԿ-ն լքելու կամ Ռուսաստանի հետ դաշնակցային պայմանագիրը չեղարկելու կոչերը, բավականին լուրջ մտահոգություններ են առաջացրել ոչ միայն Մոսկվայում, այլ նաև տարածաշրջանի առաջատար խաղացողների մոտ։

Մեկ այլ հանգամանք էլ Իրանի գործոնն է։ Նենսի Փելոսիի՝ Երևանում արած հայտարարությունները Իրանի մասով, կարող են մտահոգություններ առաջացնել մեր հարավային հարևանների մոտ։ Վերջինս թերևս կարիք չունի առանձնապես ուշադրություն դարձնելու ո՛չ այդ հանգամանքի, ո՛չ էլ Հայաստանի գործող իշխանությունների վարքին։

Իրանը շարժվելու է բացառապես իր շահերով, և Հայաստանի օգտին կատարած ցանկացած քայլը բխելու է միայն Թեհրանի նպատակահարմարությունից։

Վահե Վարդանյան