Զոնդա՞ժ, թե՞ սայթաքում. Փաշինյանի սենսացիոն հայտարարությունը
ՎԵՐԼՈՒԾՈՒԹՅՈՒՆՆԵՐ
Հայաստանի վարչապետի պաշտոնը զբաղեցնող Նիկոլ Փաշինյանը երեկ իսկական տեղեկատվական սկանդալ է հարուցել՝ Ազգային ժողովում անհեթեթ և վտանգավոր հայտարարություններ անելով։
Նա նշել է, թե պետք է ստորագրի փաստաթուղթ, որի արդյունքում լիքը մարդ իրենց կքննադատի, կհայհոյի, դավաճան կասի, նույնիսկ կարող է ժողովուրդը որոշի իրենց հեռացնել իշխանությունից և, եթե դրա արդյունքում Հայաստանը 29800 քառակուսի կմ տարածքով ստանա տևական խաղաղություն և անվտանգություն, ինքը պատրաստ է դա ստորագրել։
«Ես հստակ ասում եմ այն որոշումը, որ ապահովելու է սա, ստորագրելու եմ, ինձ չի հետաքրքրում, թե ինչ կլինի ինձ հետ հետո, ինձ հետաքրքրում է ինչ կլինի հետո Հայաստանի Հանրապետության հետ»,- ասել է Փաշինյանը։
Այս արտահայտությունը պայթեցրել է Հայաստանի քաղաքական դաշտը։ Փաշինյանական կոհորտան, գիտակցելով, թե ինչ վտանգավոր անհեթեթություն է դուրս տվել իրենց առաջնորդը, սկսել են խմբագրել նրան։
Ինքը Փաշինյանն ավելի ուշ, տանից ստիպված է եղել նախ ֆեյսբուքյան գրառում անել, թե որևէ փաստաթուղթ չի ստորագրվել և չի պատրաստվում ստորագրման, ապա և անձամբ ուղիղ եթեր է մտել, հայտարարել, թե իրենց դեմ տեղեկատվական դիվերսիա է իրականացվում՝ ուղղորդված արտաքին, ոչ բարեկամական ուժերի կողմից՝ երկրի դիմադրողականությունը կոտրելու համար։
Հայտարարելով, թե Հայաստանը պատրաստ է «Խաղաղության օրակարգով» առաջ շարժվել, նա պնդել է, թե ոչ մի թուղթ չի ստորագրվել և ոչինչ նախատեսված չի եղել։
Ընդդիմությունը լայնածավալ բողոքի գործողություններ է սկսել Երևանի փողոցներում, ամբողջ գիշեր բազմահազար մեր հայրենակիցները Բաղրամյան պողոտայում և այլ վայրերում բողոքի ակցիաներ են արել, ինչը թերևս վկայում է, որ նման զգայուն հարցերում հանրությունը չի կորցրել իր դիմադրողականությունը։
Կարևորագույն հարցն այստեղ մեկն է՝ արդյո՞ք Փաշինյանը միտումնավոր, թե՞ պատահաբար է արել իր այդ «սայթաքումը», արդյո՞ք նա դրանով չէր փորձում ստուգել հանրության արձագանքը և, եթե այն բարենպաստ լիներ իր համար, կամ էլ հանրությունը բավարար չափով չարձագանքեր, ապա Փաշինյանը որևէ խնդիր չուներ հակահայ հերթական փաստաթուղթը ստորագրելու համար։
Հայկ Մինասյան
