Պապիկյանի ամբիցիաները հատում են ողջամտության սահմանները

Պաշտպանության նախարար Սուրեն Պապիկյանը բավական լուրջ ամբիցիաներ ունի և զինված ուժերի կառավարումը թողած՝ պայքարում է «Քաղաքացիական պայմանագիր» կուսակցության վարչության նախագահ ընտրվելու համար։

1or.am-ի տեղեկություններով նա բավական ակտիվ է և փորձում է իր կողմը գրավել կուսակցական ակտիվին, որպեսզի կարողանա ինքը դառնալ կուսակցության վարչության նախագահ՝ զրկելով այլ ազդեցիկ կուսակիցներին նման հնարավորություններից։

Առաջին հայացքից կարող է այս հանգամանքը բավական տարօրինակ թվալ, քանի որ պաշտպանության նախարար է ի վերջո և բավականին մեծ զբաղվածություն ունի քաղաքականությամբ չզբաղվելու, այլ փոխարենը զինված ուժերով զբաղվելու համար, սակայն միայն առաջին հայացքից, ըստ էության, նա հեռուն գնացող պլաններ ունի` հնարավոր ֆորս-մաժորների դեպքում փոխարինելու վարչապետին և որոշել է խաղադրույքը դնել ոչ թե զինվորական ղեկավար, այլ քաղաքական առաջնորդ լինելու փաստի վրա։

Ամենայն հավանականությամբ, Պապիկյանը որոշ «մեսիջներ» է ստացել, այն պայմանավորվածություններ կարող է ունենալ թե՛ ներսում, թե՛ դրսում, որ Նիկոլ Փաշինյանի հնարավոր հեռացման դեպքում ինքն է լինելու վարչապետը։ Ավելին, քաղաքական մի շարք վերլուծաբաններ կարծում են, որ Պապիկյանը նման պայմանավորվածություններ կարող է ունենալ անգամ Նիկոլ Փաշինյանի հետ, որ վերջինիս հեռացվելու դեպքում ինքը մնա վարչապետ և ապահովագրի ոչ միայն կուսակցությանը, այլ նաև իշխանություններից հեռացված Նիկոլ Փաշինյանին։

Որոշ ընթացիկ քաղաքական միտումներ գալիս են պնդելու, որ Սուրեն Պապիկյանը բավական լուրջ է տրամադրված, որ կարճ ժամանակ առաջ նա մեկնել էր Մոսկվա, որտեղ հանդիպել էր իր պաշտոնակից Սերգեյ Շոյգուի հետ, թեպետ մեր աղբյուրների փոխանցմամբ, քաղաքական շրջանակների հետ հանդիպումներ ևս ունեցել են։ Այս օրերին էլ նա գտնվում է Միացյալ Նահանգներում, այնտեղ, իհարկե, ըստ պաշտոնական հաղորդագրությունների, մի շարք հանդիպումներ է ունեցել, որոնք ամենևին էլ չեն համապատասխանում Պաշտպանության նախարարի իր պաշտոնին, թերևս միակ քիչ թե շատ նշանակալի հանդիպումը Միացյալ Նահանգների պաշտպանության փոխնախարարի հետ է եղել։

Սակայն շատ վերլուծաբաններ չեն բացառում, որ նա գնացել է պարզապես ծանոթանալու քաղաքական իստեբլիշմենթի որոշ փորձագետների հետ, նրանց ներկայացնի իր մոտեցումները, Միացյալ Նահանգների հետ համագործակցելու դեպքում, որպեսզի Նիկոլ Փաշինյանի հեռացումից հետո հանկարծ որևէ այլ թեկնածուի վրա խաղադրույք չանեն։

Հնարավոր քաղաքական վերադասավորումները կարող են ստեղծել ֆորս-մաժորային իրավիճակ, որ Փաշինյանն ինքը ստիպված լինի հրաժարվել պաշտոնից, իսկ նման դեպքում իրեն շատ ավելի ձեռնտու է ունենալ հավատարիմ մեկին, որին էլ կարող է թողնել իշխանությունը, իսկ ինքը հեռանա վայելելու Հայաստանը պարտության տանելու համար իր ստացած «պտուղները»։

Էդգար Գրիգորյան